Астана және Қазақстан митрополиті Александр мен Қостанай және Петропавл епархиясының епископы Анатолийді солтүстікқазақстандықтар әуежайда нан мен тұзбен қарсы алды.
Астана және Қазақстан митрополиті Александр, Қазақстан православ шіркеуі Митрополиттік аймағының басшысы :
-Митрополиттік аймақ – ағартушылық, миссионерлік және баспа қызметін үйлестіру мақсатында құрылды. Сондай-ақ епископтар халыққа жақын болып, епархиялар арасында ерекше қарым-қатынас орнатуға мүмкіндік туады. Қазақстан православ шіркеуі бірнеше жаңа епархия ашып отыр. Бұл – Қарағанды, Қостанай – Петропавл және Павлодар-Өскемен епархиялары. Біз солтүстік Қазақстанға жаңа Қостанай және Петропавл епархиясының епископын таныстыруға келдік.
Жаңа епархияның епископы Анатолий бірден еліміздің екі облысында еңбек ететін болады.
Қостанай және Петропавл епархиясының епископы Анатолий:
–Өзгерістер болуы керек. Қызметті үйлестірген жағдайда нәтиже де жақсы болады. Бұл жаңа бастама жемісті болады деген сенімдеміз.
Қазақстандағы жаңа үш епархия орыс православ шіркеуінің шешімімен құрылып отыр. Олар – православ шіркеуінің митрополиттік аймағының құрамында бұрын болған үш епархияны қайта ұйымдастыру нәтижесінде дүниеге келді. Енді православ құрылымдарының орталықтары 6 қалада – Астана, Алматы, Орал, Қарағанды,Қостанай және Павлодарда орналаспақ. Митрополиттік аймақты қайта ұйымдастыру Қазақстан православ шіркеуінің қызметін үйлестіруге мүмкіндік береді деген сенімде дін басылары.
Айымгүл Әбілева