Көрменің басты тақырыбы – салауатты өмір салты, жағымсыз әдеттерден аулақ, дені сау ұлт. Бұл шараның бастамашысы да «Ұлт денсаулығы» әлеуметтік бағдарламасын қолдаушы СҚО зерттеу және аурудың алдын алу орталығы.
Арина Кенжетаева, әлеуметтік бағдарлама менеджері:
-Балалар біздің болашағымыз. Сондықтан біз олардың салауатты өмір салтын қалай түсінетінін білгіміз келді. Олар суреттерін салып бізге әкелді.
Түрлі түстермен құбылған суреттердің авторлары – қазақ мектеп гимназиясы жанындағы «Балдырған» және №40 орта мектептің «Жас батыр» аулалық клубтарының тәрбиеленушілері. Стендке барлығы 40 шақты туынды ілініпті. Көрменің бір ерекшелігі – балалардың еңбектерін саябақта демалушылар бағалады. Кішкентай қазылар өздеріне ұнаған суретке стикер жапсырып, дауыс берді. Кішкентай суретшілердің қолынан шыққан туындыларға жас әскерилер де өз пікірлерін білдірді.
Нияз Әбділманов:
– Мен мына баланың салған суретіне тәнті болдым. Негізі өзім қазіргі жастарға риза болам. Осындай плакаттар салып, насихат жүргізетіндеріне.
Жасұлан Қарсақов:
-Бұл суретке дауыс берген себебім темекі, наркотикке тыйым салынған.
Балалардың еңбегіне сүйсінген демалушылардың дауыстары бойынша жеңімпаздар анықталды. Кішкентай Таня өзінің алғашқы жеңісіне дән риза.
Татьяна Шишкина, 3-ші орынның иегері:
-Мен үшінші орын алғаныма қуаныштымын. Енді тек беске оқитын боламын.
Кәусар Аяпбергенқызы