Аяғын шалыс басып темір тордың ар жағына түскендердің арасында спортқа бейімдері аз емес. Тіпті халықаралық үлкен додаларда еліміздің туын желбіреткендер де бар. Солардың бірі – осы мекемеде жазасын өтеуші Ақжан Ахметолдин. Ол 1995 жылы жастар арасындағы грек-рим күресінен әлем чемпионы атанған.
Ақжан Ахметолдин, жазасын өтеуші:
-Мен осында спорт секциясының жетекшісімін. Президентіміз айтқандай, спортты қолдау керек. Біз осылайша денсаулығымызды нығайтамыз.
7-ші рет өткізіліп отырған спартакиада волейбол, футбол, шахмат, теннис, жүгіру сияқты 9 спорт түрін қамтиды. 1000-ға жуық сотталғандар арасынан қатысуға ниет танытқан 9 команда өзара сайысқа түседі. Мұндай шараларға ардагерлер кеңесі жиі қатысып тұрады.
Ғалымжан Жексембинов,ҚТЖ комитеті департаменті ардагерлер кеңесінің төрағасы:
-Біз мұндағылармен әрдайым бірге жұмыс істейміз. Келіп ақыл-кеңесімізді айтамыз. Жігіттер бізді тыңдайды. Бүгін бәрі жақсы дайындалған.
Шараның салтанатты ашылуынан соң командалар футбол ойынын бастап кетті.
Айқын Баженов, 164/3 мекемесінің тәрбие жұмысы бөлімінің бастығы:
-Шараның мақсаты – сотталғандардың денсаулықтарын нығайту. Біз спорттық шараларды жиі өткіземіз.
Спартакиаданың қорытындысы тамыздың соңында шығады. Жеңімпаздар сыйлықтармен марапатталмақ.
Кәусар Аяпбергенқызы