Бұл цехтағы жұмыстың басталғанына 3 ай ғана. Құжаттарды ресімдеу, қондырғыларды жеткізіп, орнату, жұмысшыларды үйрету – осының барлығы реттелісімен наубайхана іске қосылып, хош иісті сары бөлке сауда сөресіне жетті. Салмағы 600 грамм нан цехтан 34 теңгеден жөнелтіледі.
Мұрат Мұрадов, цех технологы:
-Тәулігіне 1000 бөлке шығарамыз. Құдай қаласа 4000- ға дейін жеткіземіз. Ыстық нан қалаға, Озерный, Мичуринге жеткізіледі.
Цехта бір ауысымда 4 адам жұмыс істейді. Пештің қуаты бір салғанда 330 бөлке пісіруге шақталған. Ағайынды Мұрадовтар әуелден наубайхана ісін меңгерген. Сондықтан нан пісірудің қыр-сырын жақсы біледі. Ас атасының сапасы тұтынушылардың оң бағасына ие болған.
Мұрат Мұрадов, цех технологы:
–Алғашында 1-2 ден беріп кететінбіз. Қазір 20-50–ден алып жатыр.
Алдағы уақытта цехта нан пісіретін тағы бір қондырғы қою жоспарланған. Тоқаш пісіру қолға алынса, жаңа жұмыс орындары да ашылады.
Вячеслав Иванов, наубайханашы:
– Цех салынып жатқанда көмектескенмін. Кейін наубайханашы болып орналастым. Жағдайымыз, жалақымыз жақсы.
Цех басшысы, “Қала нан ” серіктестігінің директоры Ескендір Мұрадов бүгінде елімізде кәсіпкерлікті дамыту үшін жағдайдың толық жасалғанын айтады. Ендеше кәсіпкерлер де елдің дамуына, азық-түлік қауіпсіздігін қамтамасыз етуге үлестерін қосулары керек.