Бүгінде облыстық мәслихаттың құрамында 35 депутат бар. Әдетте олар бас қосатын залда бүгін кілең жастар жайғасқан. Нағыз депутат болу үшін жастарға біраз тәжірибе жинақтап, өмірде көрген-білгендерінен ой түю керек. Әзірге студенттер өздерін жастар мәслихатында байқап көрмек.
Сәркен Нұрсаят – № 26 және № 20 мектептер орналасқан огругтен сайланатын кандидаттың бірі. СҚМУ-дің 2 курсында білім алып жүрген студент демократиялық сайлауда жеңемін деп белді бекем буған. Депутаттық мандатқа үміткерлердің бір де бірі бұрын-соңды сайлауға кандидат ретінде қатысып көрмеген. Өз тәжірибесімен облыстық мәслихаттың депутаты Жамал Ахметова бөлісті. Депутаттықтан үміткерлер мәслихатқа келіп, кез-келген халық қалаулысының жұмысымен таныса алады. Кейін қоғамдық бірлестік ретінде құрылатын ұйымның депутаттары нағыз халық қалаулыларына көмекші ретінде қызмет атқармақ.