Солтүстікқазақстандық диқандар егіс алқаптарын арамшөптен, зиянкестер мен түрлі аурудан қорғауға кірісті. Облыста 2024 жылға арналған пестицидтерді субсидиялау бағдарламасы аясында тиісті химиялық өңдеу жүргізуге 11,3 млрд теңге бағытталған. Қызылжар ауданындағы «Елім-Қызылжар» серіктестігінің мамандары алқаптарды өңдеу шараларына бірер күн бұрын кірісіпті. Жұмыс таң атқаннан кешке дейін жүргізіледі.
ОЛЕГ ИВАНОВ, «Елім-Қызылжар» ЖШС директоры, Қызылжар ауданы:
– Бүгінге дейін жұмыстың 65 пайызы орындалды. Зиянкестерді жаз бойы улаймыз. Егіс алқабы 1200 гектарды құрайды. Биылғы көктемгі-дала жұмысы сәтті өтті. 9 дақыл түрін ектік. Техникамен де толық қамтамасыз етілгенбіз. Құрал-жабдықтардың барлығы дерлік жаңа. Сыйымдылығы 6 мың тонна болатын 2 көкөніс сақтау қоймасын салдық.
Биыл өңірде 3 млн гектардан астам жерде арамшөпке қарсы, 211 мыңнан астамында – зиянкестерге қарсы және 600 мың гектарға жуығында түрлі ауруға қарсы химиялық өңдеу жұмысы жүргізіледі.
Гүлден Сембаева