Көздің жауын алатын таңдаулы туындылар. Көк аспан, мөлдір тұнық көл мен жасыл желек сипатталған суреттер көрмесі облыстық бейнелеу өнері музейінде қанат жайды. Картиналардың авторы – Виталий Жуков. Қылқалам шеберінің қолынан шыққан 12 туындының әрқайсысынан ерекше мән-мағына, көркемдікті көруге болады. Көрме – “Пленэр-жаз 2023” деп аталады.
ВИТАЛИЙ ЖУКОВ, суретші:
– Көрме туралы айтатын болсам, тақырыбы “Пленэр-жаз 2023” деп аталады. Пленэр дегеніміз – суретші далаға шығып, ашық аспан астында сурет салу. 12 туынды өткен жылғы жазда салынған, есеп беру көрмесі деп айтуға да болады. Тағы бір ерекшелігі, мұнда жаңа туындылар ғана емес, 3 көркемдік стильді де ұсындым, олар: фотореализм, пуантилизи және психоделизм.
Виталий Жуков – өзінің ерекше стилімен танымал. Сонысымен тұрақты көрерменін тауып отыр. Туындыларының басым бөлігі пейзаж жанрына бағытталғанын да көзі қарақты көремен жақсы біледі.
ВИТАЛИЙ ЖУКОВ, суретші:
– Мен ешқашан сурет салу туралы алдыма мақсат қоймаймын. Локация көріп қалсам, керек-жарағымды жинап, жұмысқа кірісіп кетем. Менің негізгі мақсатым – сезінген эмоциям мен көргенімді жеткізу.
Музейге келген халық суреттерге таңдана да таңқала қарап жүр. Таңдай қағарлық әсем картиналарды мұқият тамашалап, мән-мағынасын ұғынып жүр.
ВИКТОР ДЕНИСЕНКО:
– Маған түгелі дерлік ұнады. Бұл суретшінің көрмесіне алғаш рет келуім. Суреттерге қарап жүріп ертегі әлеміне түскендей күй кештім. Күнделікті көз алдымыздағы тұрған ескі үйлер – біздің қаламызды керемет суреттеген. Шедевр деп айтуға болады.
Қиялшыл жерлесіміздің бойы түрлі талант пен дарынға толы. Қылқалам шебері – музыкант, спортшы әрі коллекционер. Өзі 35 аспапта еркін ойнай алады.
Ақжүніс Мұқатай