Облыс әкімі 8 Наурыз халықаралық әйелдер күні мерекесі қарсаңында педагогика ғылымдарының кандидаты, ҚР білім беру саласының құрметті қызметкері Рауза Қашенованы құттықтады. Өмірінің жарты ғасырға жуығын музыкаға арнаған ұлағатты ұстаз талантты вокалистердің бірнеше буынын тәрбиелеп, музыкалық фестивальдердің лауреаты болды. Бүгінгі күні еңбегі еленіп, аймақ басшысы ел Президентінің құттықтау хатын табыстады.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
– Бүгін сізге Мемлекет басшысы Қасым-Жомарт Кемелұлы Тоқаевтың атынан құттықтау хатын тапсыру құрметіне ие болдым. Мен сіздің жетістіктеріңізді қараған болатынмын, өте көп екен. Сізге денсаулық пен жұмысыңызға табыс тілеймін. Еңбегіңіз жемісті болсын!
Мұғалімнің кәсібилігі шетелдегі дүйім жұртты да таңқалдырып үлгерді. Рауза Абуталипқызы 2021 жылы өнерді дамытуға қосқан ерекше еңбегі үшін Оксворд университетінің құрметті профессоры орденімен марапатталған. Соңғы 18 жыл Ермек Серкебаев атындағы өнер колледжін басқарады.
РАУЗА КАШЕНОВА, Е.Серкебаев атындағы өнер колледжі-өнерде дарынды балаларға мамандандырылған мектеп-интернат кешенінің директоры:
– Біздің колледжде құрал-жабдықтың, яғни аспаптардың түр-түрі бар. Музыканттардан бөлек, суретшілеріміз де талантты. Үнемі мұражайларға барып, көрмелер ұйымдастырамыз. Оқытушылар құрамы да кәсіби біліктілікке ие. Оқу ордасында барлық жағдай жасалған.
Өңір басшысының айтуынша, Рауза Қашенева – Солтүстік Қазақстанның мақтанышы. Зейнеткер мереке қарсаңында Президенттің құттықтауын облыс әкімінің өзі келіп табыстайтынын мүлдем күтпеген. Еңбегі еленіп, мұндай марапатқа ие болғанына қуанышты екенін айтады.
РАУЗА КАШЕНОВА, Е.Серкебаев атындағы өнер колледжі-өнерде дарынды балаларға мамандандырылған мектеп-интернат кешенінің директоры:
– Өте керемет сезімдемін. Біздің әкім өте қарапайым, жақсы адам. Осындай дәрежедегі адаммен бірінші рет кездесіп тұрмын. Үйіме келіп құттықтап жатыр, алғысым шексіз! Өте қуаныштымын, өйткені, әйелдер мерекесі қарсаңында мұндай сыйлық алу мен үшін өте қымбат.
Рауза Кашенованың жетістіктері туралы ұзақ айтуға болады. Мысалы, педагог италиялық органист Артуро Сакеттидің концертіне қатысып, Нидерландыға гастрольдік сапарымен барған, 15 жеке концерт беріп, қазылар алқасының мүшесі ретінде Амстердам консерваториясында Белканто фестиваль-конкурсына қатысқан. Бұл Қазақстанның білім беру саласында еңбек еткен ұстаздың жеткен жетістіктерінің аз ғана бөлігі ғана.