Жастар арасында діни экстремизм мәселесі өзекті күйінде қалып отыр. Қоғамның қызу талқысына түскен проблема Ғ.Мүсірепов атындағы облыстық балалар мен жасөспірімдер кітапханасында кезекті мәрте ортаға салынды. Нақтырақ айтсақ, мұнда қыз-жігіттердің жат ағымның жетегінде кетуі және төнетін қауіп-қатер кеңінен сөз болды. Аса пайдалы жиынның ұйымдастырушылары – дін істер басқармасы мен қалалық жастар ресурстық орталығы.
НҰРТАС НҰРМАҒАМБЕТ, СҚО дін істер басқармасының бас маманы:
– Негізгі біздің бағытымыз – профилактика. Себебі, қазіргі таңда жастардың көбі деструктивті діни ағымдарға кетіп жатыр. Біздің мақсатымыз – жастардың улануының алдын алу. Айта кететін жайт, өткен жылы дін істер басқармасы уәкілетті органдармен бірлесіп, дін саласындағы заң бұзушылықтың 21 фактісін анақтады.
Экстремизм – қоғам дерті. Осыны алға тартқан басқарма өкілдері өткен жылы ауқымды жұмыс атқарыпты.
НҰРТАС НҰРМАҒАМБЕТ, СҚО дін істер басқармасының бас маманы:
– 2023 жылдың қорытындысы бойынша 30 311 адамды қамтитын 2 427 іс-шара өткізілді. Ал жастардың категориясы бойынша 23 240 адамды қамтитын 892 шара өтті.
Өскелең ұрпақтың рухани-адамгершілік тәрбиесін нығайту, патриоттық сезім мен мәдениеттілік деңгейін арттыру. Бұл – діни экстремизмге жат, яғни қарама-қайшы белгілер. Бүгінгі жиынға келген ұл-қыздар өзекті тақырыптың аясында видеоролик көріп, қойылған сұрақтарға жауап берді.
АНАСТАСИЯ ШАЧНЕВА, қалалық жастар ресурстық орталығының жастармен жұмыс жөніндегі нұсқаушысы:
– Экстремизм тақырыбындағы семинарлар жыл сайын ұйымдастырылады. Бүгінгі шараға Б. Әшімов атындағы машина жасау және көлік, Солтүстік Қазақстан кәсіби-педагогикалық және Петропавл жоғары құрылыс-экономикалық колледжінің студенттері келіп отыр. Жиын барысында ұл-қыздармен ашық әңгімелестік. Ойларын білу үшін сұрақ-жауап та ұйымдастырдық. Бұл бастама әрмен қарай жалғасын табады.
Қоса кетейік, жастар арасында діни экстремизмнің алдын алу тақырыбындағы шараға 40-қа жуық жас қатысты.
Ақжүніс Мұқатай