Өңірдегі криминогендік жағдай тұрақты. Бұл жайлы журналистермен жүздескен Солтүстік Қазақстан облысының прокуроры мәлімдеді. Қайрат Әбдіхановтың айтуынша, өлкеде қылмыс деңгейі 20,1% төмендеген.
ҚАЙРАТ ӘБДІХАНОВ, СҚО прокуроры:
– Азайған қылмыс түрлері: кісі өлтіру – 46,2%, денсаулыққа ауыр зиян келтіру – 2,6%, ұрлық – 24,8%, бұзақылық -17%, алаяқтық – 13%, есірткімен байланысты қылмыстар – 4,6%, кәмелетке толмағандарға қатысты жыныстық қатынас – 66,7%, тонау – 21,7% және қорқытып алушылық 33,3% төмендеген.
Дегенмен, жағаны жайлауға жібере алмаймыз. Өңірде мал ұрлығы, есепшот-фактураларын заңсыз жазып беру, денсаулыққа келтірілген ауыр зиян салдарынан өлімге әкеліп соқтыру бағытында қылмыстық фактілердің өсуі байқалады. Баяндамасында Қайрат Әбдіханов мырза өндіріп алу бойынша да сөз қозғады.
ҚАЙРАТ ӘБДІХАНОВ, СҚО прокуроры:
– Прокурорлардың актілері бойынша шамамен 300 млн теңге өндіріліп алынды, оның ішінде: мемлекеттік бюджетке 175 млн теңге, сомасы 276 млн теңгенің мүлкі қайтарылды, сомасы 110 млн теңгеге әкімшілік айыппұл өндіріліп алынды. Прокурорлармен жүргізілген тексеру қорытындылары бойынша бюджетке шамамен алдын ала шығын 30 млн теңгені құрайтындығы анықталды, аталған факті бойынша арнайы прокурорлармен 2 қылмыстық іс басталды және тергелуде.
Бизнесті қорғау – Президент тапсырмасы. Бұл бағытта өңір прокурорлары жатпай-тұрмай жұмыс жүргізіп жатыр. Қуанышымызға орай, нәтиже бар. Ағымдағы жылдың 6 айы ішінде қадағалаушы орган өкілдері 800-ден астам кәсіпкердің құқығын қорғапты.
ҚАЙРАТ ӘБДІХАНОВ, СҚО прокуроры:
– Жер қатынастары саласында жалпы аумағы 52 мың га 360-тан астам заңсыз ұсынылған жайылым жерлер қайтарылды (елді мекендердің шекараларындағы), оның ішінде 36 мың га 237 жер учаскесі қайтарылды, соттың өндірісінде осындай 6147 гектар жерді алу туралы 29 талап арыз қаралуда.
Облыс прокуроры мен орынбасарлары баяндама жасап болған соң журналистер белсенділік танытты. Олар әртүрлі салаға қатысты сұрақтар қойды. Сәуір айында Петропавлда сепаратизм ісі бойынша бірнеше адам ұсталғаны мәлім. Тілшілер осы жайлы ақпар сұрады.
СӘКЕН ЖОРАБЕКОВ, СҚО прокурорының орынбасары:
– Қазір тергеу жүргізіліп жатыр. 3 адам қамауда отыр. Қалған дерекпен істі сотқа жібергенде бөлісеміз.
Ақпанда қаламыздағы №4 мектепке 9-шы сынып оқушыларының бірі балта мен пышақ әкеліп, бірнеше баланы жарақаттағаны елге мәлім. Бұл факті бойынша да әлі тергеу жүргізіліп жатыр. Прокурорлар толық ақпармен кейін бөлісеміз деді.
Байболат Култанов