Петропавл қаласындағы Назарбаев Зияткерлік мектебінде бағдарламалау бойынша қалалық олимпиада өтті. Алғаш рет ұйымдастырылған білім бәйгесіне облыс орталығының 13 мектебінен 110 оқушы қатысты. Екінші кезеңге жастардың 50-і жолдама алды.
ӘДІЛБЕК ЫСМАҒҰЛОВ, НЗМ информатика пәнінің мұғалімі:
– Аталған іс-шараны білім бөлімімен бірге алғаш рет өткізіп жатырмыз. Қалалықтан соң бұл олимапиаданы облыстық деңгейде ұйымдастырғымыз келеді. Басты мақсатымыз – балаларды бағдарламалауға қызықтыру, үйрету. Өйткені бүгінде бағдарламалау қарқынды дамып келе жатқан саланың бірі.
Олимпиадаға 7-12 сынып оқушылары қатыса алды. Оқушыларға күрделілігі әртүрлі бірыңғай тапсырмалар берілгенімен, олардың білімі жас ерекшеліктері бойынша бағаланды.
– Мен үшін бұл алғашқы тәжірибе болды. Мен олимпиадаларға қатысқаныма қуаныштымын, өз дағдыларымды байқап, барлық мүмкіндіктерді көрсеттім. Алдағы уақытта осындай жобаларға тағы да қатысуды жоспарлап отырмын.
– Маған олимпиада ұнады. Осындай іс-шараны ұйымдастырған мектеп өкілдеріне алғысымды білдіремін.
Бағдарламалау олимпиадасының қорытындысы бойынша 7-9 сынып оқушыларының арасында бірінші қалалық жалпы білім беретін ІТ-лицейден Никита Воронин 1 орынды иеленді. Ал жоғары сынып оқушыларының арасында бірінші қалалық жалпы білім беретін ІТ-лицейдің оқушысы Данила Аксенов жеңіске жетті. Жеңімпаздар мен жүлдегерлер грамоталармен және демеушілердің сыйлықтарымен марапатталды.
КОНСТАНТИН АЛИМБАЕВ, кәсіпкер:
– Біздің өміріміздің барлық аспектілері ІТ саласымен байланысты – бұл банктер, мемлекеттік қызметтер және бизнес. Осылардың барлығында автоматтандыру, білікті мамандардың жұмысы қажет. Аталған іс-шараға қатысушылар біздің мемлекетімізде осы саладағы жаңа кәсіпқойлар болады деп сенемін.
Келесі жылы Петропавл қаласындағы Назарбаев Зияткерлік мектебінің педагогтары облыстық олимпиада өткізуді жоспарлап отыр.
Байболат Култанов