Полиция департаментінің бастығы Айдын Қабдұлдинов департаменттің жеке құрамымен кездесті. Жиында қызметкерлер арасындағы тәртіпті нығайту және жемқорлыққа жол бермеу туралы мәселе қаралды. Сондай-ақ, тұғындардың жол жүру ережелерін қаншалықты сақтайтындығы талқыланды. Отырысқа жедел қызметтердің, патрульдік полицияның жеке құрамы мен бөлімше басшылары қатысты.
АЙДЫН ҚАБДҰЛДИНОВ, СҚО ПД бастығы:
– Арамызда білімді, білікті, тәжірибелі мамандар баршылық. Бірақ, бір ғана полиция қызметкері аяғын шалыс басса, бұл барлығымыздың атымызға кір келтіреді. Жеке құрамның және бүкіл полиция департаментінің атақ-абыройы жоғалады. Сол себепті, бұндайға жол бермеу керек.
600-ге жуық маманға тәртіп сақшыларынан кеткен олқылық жайлы бейнероликтер көрсетілді. Айдын Қабдұлдиновтың айтуынша, полиция қызметкерлері көп жағдайда бейнебақылауға қатысты талаптарды орындамайды.
АЙДЫН ҚАБДҰЛДИНОВ, СҚО ПД бастығы:
– Кейбір қызметкерлер камераларды өшіріп тастап, оны патрульдік көліктің салонында қалдырады. Ереже бұзған автокөлік жүргізушілеріне айыппұл салудың орнына ақша бопсалайды. Бейнекамераға жазылып қалған видеолар 1 ай бойы сақталады. Біз оны келген уақытта қарап, тәртіп бұзған тәртіп сақшысының өзін жазаға тартамыз.
Полиция қызметкерлері тарапынан қандай да бір заңбұзушылық жасалса, қауіпсіздік басқармасына хабарлау керек дейді департамент басшылығы. Сондай-ақ, ел бойынша 1402 – ІІМ бірыңғай сенім телефоны жұмыс істейді.
Гульден Симбаева