Өңірде 43 мыңнан астам адам иммундау шарасының толық курсынан өтті

Денсаулық сақтау

19:16 9 Маусым 2021

Өңірде соңғы тәулікте тәжді вирус 11 адамның бойынан табылды. Әдеттегідей науқастардың басым бөлігі – петропавлдықтар. Облыс орталығында COVID-19-ды 9 тұрғын жұқтырып алған. Қалған екі жағдай Аққайың ауданында тіркелді.

 Меруерт Атамбаева – СҚО санитариялық-эпидемиологиялық бақылау департаментінің бөлім басшысы:

-Өңірдегі эпидахуал күннен-күнге тұрақталып келеді. Қыс мезгілінде бір тәулікте 100-ден астам жағдай тіркелсе, қазір 20 жайттан аспайды. Эпидемиологиялық жағдайды тұрақты қылып ұстау үшін тұрғындарды иммундау шарасына қатысуға шақырамыз. Вирустың жұқтыру фактілерін азайту үшін ұжымдық иммунитетті қалыптастыруымыз қажет.

Ұжымдық иммунитетті қалыптастыру үшін облыс тұрғындарының 60 пайызы вакциналануы қажет. Теріскейде иммундау шарасы ақпан айынан бері жүріп жатыр. Үш екпенің бірін таңдауға болады: қазақстандық “QazVac”, ресейлік “Спутник V” және Біріккен Араб Әмірліктерінде шығарылған қытайлық “HayatVax” препараты. Бүгінге дейін 79 мыңға жуық солтүстікқазақстандық вакцина қабылдаудың алғашқы кезеңінен өтті. Екінші компонентін де салдырғандардың саны 43 мыңнан асады. Облыстық санитариялық-эпидемиологиялық бақылау департаментінің бөлім басшысы Меруерт Атамбаеваның сөзінше өңірде вакцина қоры жеткілікті.

Меруерт Атамбаева – СҚО санитариялық-эпидемиологиялық бақылау департаментінің бөлім басшысы:

-Қазір облыс бойынша “Спутник V” вакцинасының 1-ші компонетінің 25 мыңнан астам дозасы бар. “QazVac”-тың 800-ге жуығы және “HayatVax”-тың 16 мыңнан астам дозасы бар. 2-ші компоненттері де жетерлік.

Сөз соңында айта кетейік, вакцинаның қос компонентін де салдыртқан жандарға біршама жеңілдіктер жасалады. Яғни, ел көлемінде жүріп-тұруға еш кедергі жоқ. Олардан ПТР тест талап етілмейді.

Дана Ешкенова

 

Бұдан әрі оқыңыз

Бескөлде 130 адам ауыз судан уланды
Өңірде 46 мыңнан астам адам иммундаудың толық курсынан өтті
СҚО-да 42 мыңнан астам адам екпені толық қабылдады
Шектеу шаралары жеңілдетілді
43 мыңға жуық солтүстікқазақстандық толық вакциналаудан өтті
МӘМС аясында дәрі-дәрмекті тегін алуға болады
Әткеншектен құлап, жарақат алған балалар саны артуда
COVID-19-ға қарсы вакцина алудың маңыздылығы