Жұма күні Петропавлдағы Сити молл сауда үйінде жастарға арналған бос жұмыс орындарының кезекті жәрмеңкесі өтті. Мұнда екі қолға бір күрек іздеп жүрген азаматтарға 10-нан аса кәсіпорын жұмыс ұсынды.
Жалпы, жыл басынан солтүстікқазақстандық 2 мыңға тарта қыз-жігіт еңбекпен қамтылған. Әлі жұмыссыз жүргендері 1500-ге жуықтайды. Ұйымдастырушылардың айтуынша, қазіргі таңда мамандарға, әсіресе қызмет көрсету саласында сұраныс басым көрінеді.
Сондай-ақ, бұл күні шара аясында балаларға арналып “Шеберлер қаласы” атты көрме ұсынылды. Мұнда өскелең ұрпақ дәрігер, құтқарушы, аспаз, флорист сынды 10-ға жуық маманның кейпіне ене алды. Яғни, кәсіп иелері жас ұл-қыздарға күнделікті жұмыс барысында қолданатын құрал-жабдықтарын көрсетіп, өз істерінің қыр-сырын баяндап берді.
Гүлдана Рысбаева – СҚО жастар саясаты мәселелері жөніндегі басқарманың бөлім басшысы:
– Осы шара бірінші рет өткізіліп отыр. Бұл көрме оқушыларды кәсіпке бейімдеуге бағытталған. Көрменің негізгі мақсаты-жастарға түрлі кәсіптердің атрибуттарын ұстатып, көрсету. Мысалы,аспаздардың қалай тамақ пісіретінін, шаштараздардың шаш үлгісін істеген көре отыра, өздерінің болашақ мамандықтарын таңдай алады.
Тогжан Акмагамбетова