Таңғы жетілер шамасында өрт сөндіру бөліміне аталған елді мекендегі үйлердің бірі отқа оранғаны туралы хабар келіп түскен. Дереу оқиға орнына 2 автокөлікпен 9 құтқарушы жіберіледі. Алайда, мамандар жеткен кезде үйдің шатыры опырылып түсіп, күл-талқаны шыққан екен. Сөйтіп, көлемі 90 шаршы метр жер күлге айналған. Өрт бастау алғанда үйде 5 адам болыпты. Оның үшеуі сыртқа шығып үлгеріп, аман қалған. Ал 67 және 56 жастағы екі нәзікжанды үй ішінде көз жұмған. Сондай-ақ, бір адам тұншықтырғыш газбен улану себебімен аудандық ауруханаға жатқызылды. Алдын ала болжамдарға қарағанда, апат пешті дұрыс пайдаланбаудан болған. Қазір келтірілген шығын көлемі анықталып жатыр. Жалпы, жыл басынан өрт салдарынан 9 солтүстікқазақстандық қаза тапқан. Осы ретте төтенше жағдайлар департаментінің мамандары тұрғындарға өрт қауіпсіздігі ережелерін сақтау керек екенін ескертуде.