Полиция қызметкерлерінің айтуынша, балалардың қатысуымен болатын көлік оқиғалары көбіне оқу жылында, яғни балғындар мектепке барған уақытта орын алады. Сол себепті аталмыш акция облыс бойынша жиі өткізіліп тұрады екен.
Әбілсейіт Жолаушин – СҚО ІІД әкімшілік полиция басқармасының аға инспекторы:
-Бүгінгі “Абайлаңыз, балалар” шарасының мақсаты балалардың қатысумен болатын жол-көлік оқиғаларын болдырмау. Мектептің қасында балалар жолға шығып кетеді. Сол себепті осындай іс-шара ұйымдастырамыз.
Көлік тізгіндеген жүргізушілер бұл шараның өткізілуін толығымен құп көреді.
-Бұл әрине маңызы бар іс-шара. Сонымен бірге, балалар осы акцияның барысында жол ережесін біраз пысықтап алады. Және оны бұзбауға тырысады.
-Жол ережесін бұзбай жүру бұл әрбір азаматтың парызы. Сол себепті осындай акцияның маңызы зор.
Айту керек, жыл басынан балалардың қатысуымен 30 жол-көлік оқиғасы тіркелген. Оның ішінде екі балғын қаза тауып, 31-і түрлі дене жарақатын алыпты.
Айгерим Ержанова