Желтоқсан айындағы үшінші онкүндікте ауа райы күрт жылып сала берді. Салдарынан тас жол көк тайғаққа айналды. Бірақ соған қарамастан, теріскейліктер мерекелік көңіл-күйлерін жоғалтпаған сыңайлы.
-Жаңа Жылда күн жылы болса деймін. Өйткені мен далада ойнап, отшашуды көруге барамын.
-Мереке күні аязды болатын сияқты. Сондықтан мешін жылын үйде отбасымызбен қарсы аламыз.
-Ауа райы -5-6 градус болса екен. Суық та емес, бірқалыпты жылы температура. Көңіл-күйіміз де жақсы, көтеріңкі болушы еді.
Казгидромет орталығы мамандарының айтуы бойынша, жаңа жыл қарсаңында ауа температурасы күрт төмендеуі мүмкін.
Гүлзат Ғазизова – СҚО гидрометеорология орталығының ауа райын болжау бөлімінің басшысы:
-Жаңа Жыл қарсаңында, яғни желтоқсанның 31-і күні облыстың кей аймақтарында қар жауып, қатты жел мен боран соғады деп күтілуде. Алдағы бірнеше тәулікте түнде сынап бағанасы 20-25 , кей жерлерде 28 градусқа дейін жетіп, аязды болады. Ал күндіз ауа температурасы 15-20 градусқа дейін төмендеуі мүмкін.
Ал Жаңа мешін жылының бірінші күнінде жауын-шашын болмайды. Бірақ, ауа температурасы -32 градусқа дейін төмендейді деп күтілуде. Ал 2-ші қаңтарда аяздың беті қайтып, сынап бағанасы -18 градусты көрсетеді.
Айгерим Ержанова