2013 жылғы спорт маусымында облыстың велоқұрамасындағы Арман Тулин, Богдан Гапотченко, Кирилл Вяткин, Александр Овсянников айтарлықтай жетістіктерге қол жеткізе алды. Жасөспірімдер РФ, Өзбекстан және Қазақстанның бірқатар қалаларында велосипед спортының 4 түрі бойынша тек жүлделі орындардан көрінген. Сондай-ақ Кирилл Вяткин, Александр Овсянников Түркияда өткен халықаралық додаға қатысты. Ал, Богдан Гапотченко мен Арман Турлин 3-ші Еуразиялық ойындарда тамаша нәтиже көрсетіпті. Бір сөзбен айтқанда жасөспірімдер жалпы саны 44 жүлдені қоржынға салған. Оның 18-і алтын, 10-ы күміс, және 16-сы қола медаль.
Владимир Овсянников, велоспорттан БЖС олимпиада резерві мектебінің аға жаттықтырушысы:
-Біздің облыс үшін велосипед спортының маусымы сәтті басталды. Шымкентте 1-республикалық көктемгі критериум жарысында Ақберт Сыздықов 2-ші орын иеленді. Бұл жетістікті РФ-ң Анапа қаласындағы сайыста Арман Турлин, Александр Овсянников, Богдан Гапотченко мен Кирилл Вяткин қайталады.
19-23 жас аралығындағы спортшылар мен 23 жастан жоғары санатқа кіретін ересек спортшылардың жетістігі де қуантады.
Сергей Кручина, СҚО велосипед спортынан аға жаттықтырушы, ҚР еңбек сіңірген бапкері:
-Ақпан айында ересектерден жасақталған облыс құрамасы Ресейде үздік үш тұғырға көтерілді. Олег Земляков алтын алқа иеленсе, 2-ші орыннан Кирилл Пролубников көрінді, 3-ші орын Вадим Галеевке бұйырды. Наурыз айының басында Сергей Леднев халықаралық маңыздағы жетістікке жетті. Хорватияда өткен жарыста жерлесіміз 2-орынды иеленді. ҚР чемпионатында өңір құрамасы командалық жарыста қола жүлдені еншіледі.
Андерлер арасында халықаралық дәрежедегі спорт шебері Бахтияр Қожақтаев тау велоспорты классификациясында ең мықты велошабандоз деп танылған.
Берік Қасен