Осыдан екі ай бұрын көлік прокуратурасының қызметкерлері кәсіпкерлермен кездескен болатын. Дөңгелек үстел барысында теміржол көлігі арқылы жүк тасымалдауға қатысты туындайтын мәселелер талқыланды. Осыған сәйкес қадағалаушы орган наурыз-сәуір айларында Оңтүстік Орал теміржолының Петропавл бөлімшесін тексерістен өткізген. Анықталған заңбұзушылықтар аз емес.
Нұрболат Қатуов, СҚО көлік прокуроры:
– Жүк тасымалдаушылар тарапынан жіберілген олқылықтар негізінен вагондарды уақытылы бермеу, тарифтердің өзгеруі жайлы алдын-ала хабарламау болып табылады. Және 34 кәсіпкерден заңсыз айыппұл өндірілген.
Көлік прокурорлары 1 млн 419 мың теңге көлеміндегі заңсыз өндірілген қаражатты кәсіпкерлерге қайтару туралы ұсыныс жасаған. Енді жеке іс иелері сотқа шағымданбақ. Сондай-ақ теміржол бойында жолаушылар құқығының қорғалуы мен қауіпсіздігінің сақталуы да тексерілді.
Нұрболат Қатуов, СҚО көлік прокуроры:
– Теміржол вокзалында ана мен бала бөлмесі жоқ, мүгедектерге де жағдай жасалмаған. Арнайы өтетін баспалдақтар қолданылмайды.
Қадағалаушы орган қызметкерлері жолаушылар тасымалдайтын поездарды 1-ші жолмен жүргізу жөнінде де ұсыныс жасаған. Тексеріс нәтижесінде анықталған олқылықтарды жоюға 1 ай уақыт беріліп отыр.
Инеш Шоқақова