Қаңтар – қыстың екінші айы. Негізінен қаңтарда күн ұзарып, қыс мезгіліне тән бұрқасындар мен борандар жиілейді. Ауа райын болжау орталығы мамандарының айтуы бойынша, бұл айда орташа температура – 14-18 градус шамасында болады.
Гүлзат Ғазизова, СҚО гидрометеорология орталығының ауа райын болжау бөлімінің бастығы:
– Бірінші онкүндікте ауаның температурасы түнде 15-26-ден 10-20 градус аязға, күндіз 10-18 –ден 5-18 градусқа дейін құбылады.
Ал екінші онкүндікте сақылдаған сары аяздар болуы ықтимал. Онкүндіктің соңында кей жерлерде сынап бағанасы күндіз -27, түнде 39 градусқа дейін төмендеуі мүмкін. Сондай-ақ айдың екінші және үшінші онкүндіктерінің басында кей жерлерде бұрқасынмен қатар батыстан соғатын жел секундына 15-20 метрге дейін күшейеді деп күтілуде.
Гүлзат Ғазизова, СҚО гидрометеорология орталығы ауа райын болжау бөлімінің бастығы:
– Үшінші онкүндікте ауаның температурасы түнде 18-23, кей жерлерде 28 аяз, күндіз 7-12, кей жерлерде 17 градусқа дейін аяз бірте-бірте жоғарылайды.
Өткен жылмен салыстырғанда биылғы қыс әлдеқайда жылы дейді мамандар. Тарих беттерін парақтасақ, 1948 жылдың қаңтары жайма-шуақ болыпты. Онда сынап бағанасы 4 градусқа дейін көтерілген. Ал 1940 жылдың 13 қаңтарында аяз – 44 градусқа дейін жетіпті.
Әспет Әбдірешова