Қалалық әкімдік бұл жұмысқа еріктілер тобын тартқан. Сонымен қатар Петропавл қалалық Ішкі істер басқармасының учаскелік инспекторлары да тізімдерді нақтылау жұмыстарына жәрдем көрсетуде. Еріктілер әр мекен-жайға соғып, сайлаушылардың аты-жөні, туған күні, куәлігінің нөмірі мен мекенжайы сияқты ақпараттарды жазып алады. Алаяқтық-қылмыстық фактілердің алдын алу мақсатында еріктілерге мөр басылған арнайы құжаттар табыс етілді. Сонымен қатар, қала тұрғындары өз сайлау учаскесін қалалық әкімдіктегі ақпараттың орталыққа 46-98-90 нөмірі арқылы хабарласып, біле алады. Қаңтардың 1-іне қаладағы 87 сайлау учаскесінде 151 мың 861 сайлаушы тіркелген.
Нұржан Әшімбетов, Петропавл қаласының әкімі
-Қазіргі уақытта қалаға көшіп келушілер мен керісінше көшіп кетушілердің қатары артып отыр. Сондықтан, бізге облыс орталығындағы сайлаушылардың тізімін нақтылау керек. Әр азамат ақпанның бірінен қалалық әкімдіктің электрондық сайтында аты-жөні мен куәлігінің номірін теріп, өз учаскесін анықтай алады. Барлық қала тұрғындарынан, жеке пәтер иелері кооперативтерінің төрағаларынан бұл істе көмек көрсетуді сұраймыз.
Гүлмира Шоқтыбаева