Алмаз Серік салауатты өмір салтын ұстанатын жеткіншектердің бірі. Ол 5 жыл қатарынан спорттың каратэ шинкиокушинкай түрімен шұғылданады. Қоңыр белбеу иесі көптеген дүбірлі жарыстарға қатысып, жақсы нәтиже көрсеткен.
Алмаз Серік, каратэден ҚР чемпионы:
– Маған каратэ ұнайды. Спорттың осы түрімен айналысу себебім – бұл спорт көп нәтижеге әкеледі. Алдыма қойған мақсатым – көптеген жетістіктерге жету.
Елордада өткен ел біріншілігінде Алмаз бір де бір қарсыласына дес бермеді.
Алмаз Серік, каратэден ҚР чемпионы:
– Мен 5 рет жекпе-жекке шықтым. Оның бесеуін де ұтып, бірінші орынға ие болдым. Мен Талдықорған, Теміртау, Өскенмен, Астана қалаларының спортшыларымен жекпе- жекке шықтым.
Каратэ шинкиокушинкайдан өткен ҚР чемпионатында облысымыздың намысын 5 спортшы қорғаған. Тек Алмаздың ғана жұлдызы жанды. Спортшы 40 келі салмақ дәрежесіндегі сайыскерлердің арасында үздік атанды.
Руслан Сәрсенбаев, жаттықтырушы, СҚО шинкиокушинкай каратэ федерациясының президенті:
– Солтүстік Қазақстан федерациясынан 5 бала қатысып, бірақ Серік Алмаз өте жақсы нәтиже көрсетті. Біздің федерациямыздың намысын қорғап, өте үлкен деңгейге жеткізіп, 1-жекпе-жегін 10 секундтың арасында ұтып алды. Соған да кубокке ілекті.
Қазіргі таңда өңіріміздің каратэшілері ақпан айында Ресейдің Түмен қаласында өтетін додаға қызу дайындалуда.
Айдана Демесінова