Манас Сапарәлі – Мамлют қазақ мектеп-интернатының 11 сынып оқушысы. Сондықтан оған болашақ мамандығын таңдау кезі келді. Манас өмірін әскери салаға арнауды көздеп отыр.
Манас Сапарәлі, Мамлют қазақ мектеп-интернатының оқушысы:
– Әскери боламын деп армандамаған бала жоқ шығар. Әскери болу менің де арманым. Бәрі енді ҰБТ-ге байланысты. Қолымнан келсе, әскери болу жаман мамандық емес. Отанымды қорғап, міндетімді атқарғым келеді.
Облыстық әскери комиссариат залына жиналғандар Манас сынды 2010-2011 оқу жылы түлектері. Бұл жерде оларға әскери мамандықты меңгерудің талаптары туралы айтылды. Өңір оқушыларымен Алматы қаласындағы радиоэлектроника және байланыс әскери-инженерлік институттың өкілдері әңгімелесті.
Ерлан Назарбаев, ҚР ҚМ радиоэлектроника және байланыс әскери-инженерлік институты факультетінің аға офицері:
– Қазақстанның болашақ офицері мықты маман болуы керек. Бізде негізінен радиотехник, байланыс, зениттік зымыран әскеріне 5 мамандық бойынша даярлайды.
Ол үшін ҰБТ-де мамандық бойынша физика пәнінен сынақ тапсыру қажет. Кейін үш деңгейлі медициналық тексерістен өтеді. 9 жылдық тарихы бар институттың курсанты 5 жыл бойы әскери өмірге шыңдалады. Мұнда болашақ офицерлер әскери шен алумен ғана шектелмейді. Инженер, радиотехник, байланыс маманы болып шығады. Қазір оқып жатқан 900-ге тарта курсанттың 30-ы солтүстікқазақстандық.
Жеңіс Ермұқанов