Аса маңызды сынақтан өтуге 140 каратеші дайындалыпты. Емтиханнан сүрінбей өткендерге білігіне сай белдік беріледі. 5 жасынан осы спорттың қыр-сырын меңгере бастаған Рахат Мұхамадиев көк түсті белдігін сары жолағы барына алмастыруды көздеп келіпті.
Рахат Мұхамадиев, жас каратеші:
-Осы спортқа мені әкем мен анам әкелді. Бұл спорт өте ұнайды. Мұнда менің денсаулығым күшейеді.
Кю-тест деп аталатын бұл емтиханға жасөспірімдер 4 айға жуық дайындалды. Ұзақ жаттығулардың нәтижесін аттестацияға арнайы келген бүкілқазақстандық кекушинкай карате ұйымының президенті Тәжімұрат Найзабековтың өзі бағалайды.
Тәжімұрат Найзабеков, бүкілқазақстандық кекушинкай карате ұйымының президенті:
-Бүгінгі байқауымыз біздің осындағы директорымыз жұмысының қорытындысы деп ойлаймыз. Мұндай емтихандар 6 ай сайын өтеді. Петропавл – 10 күн ішінде айналып өткен менің жетінші қалам.
Карате кекушинкайдың негізгі талабы – барлық бағдарламаларды жетік меңгеру және дене даярлығы. 16 жасар Сұлтан өз шеберлігіне сенімді, алда үлкен додаларда бағын сынамақшы.
Сұлтан Жақан, каратеші:
–5 жыл ішінде жеткен жетістіктерім баршылық. Биыл Қазақстан чемпионы атағын алдым. Мақсатым осы жазда Жапонияға барып, ашық чемпионатқа қатысып, жүлделі орын алу.
Осы сынақтан сүрінбей өтсе, бүгінгі бүлдіршіндер қара белдікке дейін апаратын қиын да қызықты жолмен карате әлеміне тереңірек бойлай бермек.