Бүгін Петропавлда «Бұл – махаббат» комедиясының түсірілімі бастау алды. Шытырман хикая орта жастағы екі адамның махаббаты жайлы болмақ. Фильмнің ерекшелігі де осында. Туындының қоюшы-режиссері – Назгүл Қарабалина. Айтуынша, Петропавл шаһарына таңдау жайдан-жай түспеген. Себебі, өңірдің табиғаты мен қаланың сәулеті көрерменге бірден жаңажылдық сезім сыйлайды.
НАЗГҮЛ ҚАРАБАЛИНА, қоюшы-режиссёр:
— Бұл қалада біз 2022 жылы «Мағжан. Мен жастарға сенемін!» телехикаясын түсірген болатынбыз. Сол кезде біз осы шаһардың әдемі архитектурасына әрі ландшафтарына қызыққан болатынбыз.
«Бұл – махаббат» комедиясының басты рөлдерінің бірін танымал актер Азамат Сатыбалды сомдайды. Оның кейіпкерінің аты – Мейіржан. Ол өте шыншыл әрі аңғал. Сахна шеберінің сөзінше дәл мұндай тұлғаны сомдау күрделі. Оған қоса ауа райы да қиындық туындатуда.
АЗАМАТ САТЫБАЛДЫ, актёр
— Күн суық. Алматыдағыдай емес басқаша, бірақ әрине алда мақсат бар. Жұмыс істеу керек. Актер болғаннан кейін барымызды саламыз, осы суық атмосфераны көрерменге жылы қылып жеткізуге тырысамыз.
ҰЛАН ЫДЫРЫС, тілші:
— Жаңажылдық «Бұл – махаббат» комедиясы Петропавлда бір айға жуық түсірілетін болады. Аталмыш туынды қалың көрерменге 31 желтоқсан күні жол тартады.