Петропавлда кекушинкай каратеден «Жаңа буын» атты облыстық турнир өтті. Жарыс «Бүкілқазақстандық Кекушинкай карате ұйымы» РҚБ облыстық филиалының 25 жылдығына орай ұйымдастырылды. Сайыс 400-ге жуық ұл-қыздың басын қосты. Бұлардың барлығы – ақ белбеу иегерлері. Айтулы шарада өңірімізде каратэ мектебінің негізін қалаған Азамат Манапов та төбе көрсетті.
АЗАМАТ МАНАПОВ, «Бүкілқазақстандық Киокушинкай карате ұйымы» РҚБ Алматы қалалық филиалы директоры:
— Осыдан 25 жыл бұрын мен Петропавл қаласында кекушинкай карате филиалын аштым. Ол кезде менің қарамағымда бар-жоғы 25-30 шәкірт болды.
Татамиға шыққан әр бала жеңіс үшін барын салды. Петропавлдық жас каратеші Глеб Голушконың икемі бірден көзге түседі. Ол қарсыласын алғашқы секундтардан-ақ соққының астына алды.Соның арқасында оған мерзімінен бұрын жеңіс бұйырды. Бір қызығы, балақайдың каратемен айналыса бастағанына небәрі 1 күн болған.
ГЛЕБ ГОЛУШКО, турнирге қатысушы, Петропавл қаласы:
— Жекпе-жек көңілімнен шықты. 7 жастамын, бұл – менің алғашқы сайысым. Карате үйірмесіне кеше ғана келіп, бүгін жарысқа қатысып отырмын. Басты мақсат – топ жару.
Ал мына жерде қыздар күш сынасуда. Елизавета Борович алғашқы қарсыласын жеңді. Тайыншалық қыз алтын медаль иеленіп, ата-анасын қуантқысы келеді.
ЕЛИЗАВЕТА БОРОВИЧ, турнирге қатысушы, Тайынша ауданы:
— Бұл сайысқа 3 ай дайындалдым. Жасым – 11-де. Мақсат айқын – үйге жүлдемен қайту. Карате үйірмесіне анам алып келді. Бұл сайыста менің сыңарым да өнер көрсетеді, оған қолдау көрсетемін.
Турнир 1 күнге созылды. Жарыс соңында мықтылар марапатқа ие болды. Айта кетейік, қазіргі таңда «Бүкілқазақстандық Кекушинкай карате ұйымының» облыстық филиалында 23 білікті бапкер 2 мыңнан астам адамды жаттықтырады. Олардың ең жасы 3-те болса, ең үлкені – 80 жаста.