12 қаңтардан бастап Солтүстік Қазақстан облысында қысқы Ұлттық біріңғай тестілеу өткізіледі. Науқан ақпанның 10 жұлдызына дейін жалғасады. Маңызды сынаққа қатысу үшін талапкерлер желтоқсанның 22 мен 30 аралығында өтініш берді. Олар: биыл мектеп бітіретін түлектер, колледж аяқтайтын жастар және жазғы емтиханда шекті ұпай жинай алмағандар. Алдағы мамырда өңірімізде 4 мыңға жуық бала мектеппен қоштаспақ. Осы ұл-қыздардың 80% қаңтардағы ҰБТ-да бақ сынауға ниет білдірген. Олар емтихан тапсыру уақыты мен күнін өздері таңдай алады.