Жыл басында ауқымды сұхбат беру – Президент Қасым-Жомарт Тоқаев ұстанатын қағида. Биыл Мемлекет басшысы “Turkistan” газетінің тілшісімен тілдесіп, өзекжарды мәселелерге тоқталды. Былтыр Салық кодексі қызу талқыға түсті. Орын алатын реформаларға халық күмәнмен қарап, көкейде күдік ұялағаны жасырын емес. Құжат жеті рет өлшеп, бір кесу арқылы әзірленді және қабылданды. Әлемдік тәжірибеге назар аударылған.
ҚАСЫМ-ЖОМАРТ ТОҚАЕВ, Қазақстан Республикасының Президенті:
— Әрине, салық реформасы – өзекті мәселе және бұған қатысты пікірталастардың болуы әбден түсінікті. Дегенмен, ел ішінде дүрбелең туғызып, жұртты дүрліктірудің ешқандай жөні жоқ. Мұндай реформа көптеген елде жүргізіліп жатыр. Мысалы, Ресейде қосымша құн салығы жуырда 22 пайызға дейін көтерілді. Біздің реформамыз – қатардағы «фискалдық науқан» емес, салық жүйесін қайта құру деген сөз. Алдымызда тұрған басты міндет – экономиканың тұрақты өсімін қамтамасыз ету. Үкіметке ашық әрі ұғынықты Салық кодексін әзірлеу тапсырылды. Министрлер кабинетінің бұл тапсырманы қаншалықты табысты орындап шыққанын биыл көретін боламыз.
Қоғам белсендісі Гүлбақша Мұсабаева өзгеріске қатысты өз пікірін білдірді. Жерлесіміздің сөзінше, салық – желге шашылатын ақша емес, мемлекеттің дамуына септігін тигізетін басты қаржы. Бұған түсіністікпен қарау қажет.
ГҮЛБАҚША МҰСАБАЕВА, заң ғылымдарының кандидаты:
— Маған Президенттің ойы ұнады. Ол салыққа босқа кеткен ақша ретінде қарамау керектігін айтты. Бұның артында адамның отансүйгіштік қасиеті тұр. Жалпы, мемлекет басшысының ойлары қазақстандықтар арасында жаңа мәдениетті қалыптастырып отыр деп санаймын.
Сонымен қатар, Гүлбақша Мұсабаева мемлекет басшысының жасанды интеллект пен цифрлық даму бағытына баса назар аударғанын жеткізді. Бұл – жаһандық жаңғырудың бастауы. Қоғам белсендісінің пікірінше, көштен қалмау үшін әр саланы алға сүйреу керек.
Ұлан Ыдырыс