Бағдарлама аясында СУАР халық үкіметінің басшылығымен ресми кездесу өтті. Онда екі өңір арасындағы келіссөздер ынтымақтастық тұрғыда екі жаққа да тиімді екендігі жөнінде әңгіме өрбіп, өзара әріптістік көкжиегінің әлеуеті зор екендігі тілге тиек етілді. Достық қатынастар туралы шарт жасасып, келісімдерге қол қою жағы нақтыланды. Алдағы жоспарларда мәдени, гуманитарлық және экономикалық байланыстарды дамыту қарастырылмақ.
ҒАУЕЗ НҰРМҰХАМБЕТОВ – Солтүстік Қазақстан облысының әкімі:
— Екі елдің де мемлекет басшылары біздің халықаралық әріптестігімізді жоғары бағалайды. Бұл ретте соңғы жылдары қол жеткізген жетістіктеріміз аз емес. Бүгінгі делегация құрамында өңіріміздегі барлық сала өкілдері бар. Бұл кездесуде де бірқатар келісімдерге қол жеткіземіз деп ойлаймын.
Сапар барысында делегация өкілдері аграрлық сектордың даму барысына ерекше назар аударды. Сондай-ақ, олар Қытай холдингінің China mengniu Dairy Group сүт өңдеу зауытына да атбасын тіреді. Әңгіме барысында компания басшылығы біздің өңіріміздегі сүтті мал шаруашылығының белсенді даму барысы мен салынып жатқан заманауи мегафермалардағы өндірістің даму перспективаларын зерттеп-зерделегендігін атап көрсетті. Соңғы уақытта Қытай мен Солтүстік Қазақстан облысы арасындағы тауар айналымы 2,2 есеге ұлғайған. Олар бүгінде біздің аймақ үшін негізгі стратегиялық серіктес болып табылады. Ағымдағы жылдың 9 айының қорытындысы бойынша Солтүстік Қазақстан облысының ҚХР-мен тауар айналымы 129 млн АҚШ долларын құраған. Тараптар алдағы уақытта да екіжақты байланыстарды одан әрі дәйекті түрде нығайтуға, әріптестік салаларын кеңейтуге және қолайлы байланыстар құруға ниетті.