Солтүстік Қазақстан облысының делегациясы ресми сапармен Қытай Халық Республикасында болды. Қазақстанның аспанасты еліндегі Төтенше және Өкілетті Елшісі Шахрат Нұрышевтің қолдауымен ұйымдастырылған бұл сапар көршілес елдің жетекші корпорацияларымен экономикалық, ғылыми-техникалық байланыстарды нығайту жолындағы маңызды қадам болып табылады. Бейжіңде Қытайдың ең ірі мемлекеттік және жеке компанияларымен, сондай-ақ ғылыми-зерттеу орталықтарымен келіссөздер жүргізіліп, жеті стратегиялық меморандумға қол қойылды. Соның бірі – қазақ-қытай бірлескен ғылыми-аграрлық орталығын құру жөніндегі құжат.
ЕРБОЛ ИСАҚАЕВ, М.Қозыбаев атындағы СҚУ басқарма төрағасы-ректоры:
— Біз Қытайдағы аса ірі инвестициялық холдинг саналатын Хэнан ауыл шаруашылығы корпорациясымен ортақ құжатқа қол қойдық. Мақсатымыз – қазақ-қытай бірлескен ғылыми-аграрлық орталығын құру. Бұл бірлестік бізге сұрыптарды сынауға, цифрлық технологияларды меңгеруге мүмкіндік береді. Арадағы байланыс ұзақ жылдарға жоспарланған. Келісім жемісті боларына, өңірдегі диқандарға пайда әкелеріне сенімдімін.
Жергілікті білім ордасы Қытай ауыл шаруашылығы ғылымдары академиясымен де келісім жасасты. Арадағы ынтымақтастық бірлескен зерттеумен айналуға, мамандардың біліктілігін арттыруға және агросектордың тұрақты дамуына бағытталған инновациялық платформалар құруға мүмкіндік бермек. Ал «Радуга» серіктестігі Хубей провинциясындағы жеңіл өнеркәсіпке арналған жабдық шығаратын компаниямен әріптестік орнатты. Бұл серіктестік картон шығаратын зауыттың салынуын және өндіріс тиімділігін арттыратын заманауи технологияларды енгізуді қамтамасыз етпек.
ДМИТРИЙ ШАРАПАЕВ, «Радуга» ЖШС бас директоры:
— Біз гофр өндіруге қажетті қондырғылар шығаратын әлемдегі үздік компаниямен келісімге келдік. Сонымен қатар, бұл ұйым қайта өңдеу саласына қажетті жабдықтар әзірлейді. 30 жылдан бері жұмыс істейді. Тәжірибесі мол. Әлемдік деңгейдегі тауарларымен танымал компаниямен байланыс орнату – біз үшін зор жетістік.
ЧЖОУ ЧЖАОМИНЬ, JS Machine вице-президенті, ҚХР:
— Біз Қазақстандағы, тіпті Орталық Азиядағы ең үлкен жобамен айналысқалы отырмыз. Ауқымды жұмыс күтіп тұр. Ортақ іске дайынбыз. Бастамамыз екі тарап үшін де тиімді боларына сенімдіміз.
2019 жылдан бері Ғ.Мүсірепов ауданында «Kazmeel» серіктестігінің құрама жем өндіру зауыты тиімді жұмыс істеп тұр. Бұл – қытайлық корпорациясымен бірлескен жоба. Ынтымақтастықты әрі қарай дамыту мақсатында тараптар мен аудан әкімдігі өзара түсіністік туралы меморандумға қол қойды.
ГЭ КАЙХУА, Beijing Xiyu Zehua Trading Group Co., Ltd. басқармасының төрағасы, ҚХР:
— Біз ескі элеваторларды қайтадан жаңғырту бойынша жұмысты дамытып, жаңа элеваторлар салғымыз келеді. Сонымен қатар, қазір терең өңдеу бойынша зауыт салатын жер қарап жатырмыз. Солтүстік Қазақстан облысында ойымыз жүзеге асады деген ойдамыз. Қазір Ғабит Мүсірепов ауданында орналасқан “Kazmeel” зауытымыз 185 адамды еңбекпен қамтып отыр. Экспорттың жылдық көлемі 500 мың тоннаны құрайды.
РУСЛАН АҢБАЕВ, Ғ.Мүсірепов ауданының әкімі:
— Қазіргі таңда кәсіпорында тәулігіне 1800 тоннаға жуық ұн дайындалады. Ағымдағы жылдың 10 айы ішінде 400 мың тоннадан астам өнім шығарылды. Тауар толығымен Қытайға сатылады. 2026 жылы өндіріс ауқымын кеңейтсек дейміз. Бүгінгі меморандум – сенімді байланыстың, қазынаға құйылған инвестицияның кепілі.
Тағы бір маңызды жайт – «Asyl Sugar» серіктестігі мен CITIC Construction компаниясы бірлесе қабылдаған құжат. Бұл меморандум 2026 жылы өңірде қант зауытының құрылысын бастауға мүмкіндік бермек. Ірі бастама – қос тарап үшін де тиімді жоба. Бұны облыс әкімі кездесуде баса айтты.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
— Сіздердің ұйым мен біздің компания арасындағы жобаның маңызы өте зор. Бұл бастама жайы еліміздің Үкімет басшысы, барлық қаржы ұйымдары біледі. Ілкімді жұмыс атқарылмақ. Болашақта жүзеге асатын жобамыз қантқа қатысты мәселелерді толық шешеді, бағаны тұрақтандыру саясатына өзіндік үлес қосады деген ойдамыз.
«Qyzyljar» арнайы экономикалық аймағының қатысушысы «Ультрадекор» серіктестігі ағаш өңдеу зауытын салмақ. Бұл жобаны жүзеге асыруға China Nuclear Engineering & Construction Corp. компаниясы қолдау көрсетеді. Сонымен қатар, Кәсіпкерлік және индустриялық-инновациялық даму басқармасы мен жаңа энергетикалық технологиялар саласындағы жетекші компаниялардың бірі – Haitai New Energy Group арасында меморандумға қол қойылды. Бұл құжат өңірде жел қуатын пайдалану жобаларын іске асыруға серпін бермек.
Байболат Құлтанов