Cолтүстік Қазақстан облысының әкімі Ғауез Торсанұлы бастаған өңір делегациясы аспанасты еліне жасаған жұмыс сапары барысында Цзянсу провинциясына да барып, ірі кәсіпкерлермен кездесу өткізді. Тараптар арадағы жаңа инвестициялық жобаларды жүзеге асыру және экспорттық әлеуетті арттыру мүмкіндіктерін талқылады.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
— Сапар аясында бірнеше маңызды құжатқа қол қойылады. Әлемдегі ең беделді мемлекеттің бірімен байланыс орнату – жарқын болашаққа жол ашатын қадам. Аспанасты елі жылдан жылға көркейіп, қарыштап дамып келеді. Мұндағы білікті мамандардан мол ақпар алып, өзімізде қолдануға тиіспіз.
СҚО делегациясы Янчжоу қаласында FAMSUN Group Co., Ltd. президенті Ричард Фанмен, Myande Group Co., Ltd. президенті Ксю Бинмен кездесіп, келіссөздер жүргізді. Жүздесуде “Қызылжар” арнайы экономикалық аймағында ауыл шаруашылығы өнімдерін қайта өңдеу мен майлы дақылдарды терең өңдеу мәселелері қаралды.
КСЮ БИН, Myande Group Co., Ltd президенті, ҚХР:
— Қазақстанда жұмыс істеп жатқан компанияларымыздың болашағы зор. Әсіресе, СҚО-ның астық өңдеуде мүмкіндігі зор. Кәсіпорным осы бағытта жұмыс істейді. Бізде заманауи қондырғылар өте көп. Компания астықты өңдеу бойынша Қытайда алғашқы орында тұр. Сонымен қатар, біз мол көлемде крахмал мен глютенді шет мемлекеттерге экспорттаймыз. Сіздердің өңірмен етене жақын жұмыс істеп, тәжірибемізбен бөліскіміз келеді.
Сапар аясында елеулі оқиға орын алды. Нанкин қаласында аймақ инвесторларын қолдау орталығы ашылды. Ол солтүстікқазақстандық кәсіпорындардың өнімдерін Қытай нарығына шығаруға септеседі. Экспортты ұлғайтып, өңірдегі кәсіпкерлік саласын дамытуға мүмкіндік береді. Сонымен қатар, стратегиялық құжат аясында бірлескен жобалар жүзеге асырылады.
РИЧАРД ФАН, FAMSUN Group Co., Ltd. президенті, ҚХР:
— Агроөнеркәсіп – екі елдің экономикасы үшін маңызды салалардың бірі. Егер мемлекет тарапынан фермерлерге зор қолдау көрсетілсе, дамудың даңғыл жолына түсетініміз сөзсіз. СҚО – ауыл шаруашылығы бойынша Қазақстандағы беткеұстар аймақтардың бірі. Сіздерден де үйренеріміз мол деп есептеймін.
Ресми сапар аясында СҚО инвесторларға қызмет көрсету орталығы мен Нанкин қаласындағы ірі мемлекеттік холдингтік компания Jiangsu SOHO Holdings Group арасында ынтымақтастық туралы меморандумға қол қойылды. Алдағы уақытта страгиялық құжат аясында бірлескен жобалар жүзеге асып, дамитын болады. Қазақстан – Қытай жарқын болашаққа бірге қадам жасамақ. Бұған өңірімізде жүзеге асырылатын ілкімді істер үлес қосары сөзсіз.
Нұрасыл Ахмет