Жерлесіміз Ислам Евлоев жуырда Сауд Арабиясының Эр-Рияд қаласында “One Nation” – “Бір ұлт” ұранымен өткен 4-ші Ислам ынтымақтастығы ойындарында грек-рим күресінен жүлдегер атанды. Палуан 87 келіде бақ сынап, финалға дейін қарсыластарынан оқ бойы оза шапты.
ИСЛАМ ЕВЛОЕВ, Ислам ынтымақтастығы ойындарының күміс жүлдегері:
— Алғашқы кездесуімді Тәжікстан өкілімен өткізіп, бірінші кезеңде мерзімінен бұрын жеңдім. Содан соң жартылай финалда Алжирден келген бірнеше дүркін Африка чемпионымен белдестім. Финалда Иран спортшысымен кездесіп, сәл қателікке жол бердім. Нәтижесінде екінші орын алдым.
Ислам Евлоев бұл жетістікке қызу дайындықтың арқасында қол жеткізді. “Ол жаттығу залында әрдайым тәртібімен, еңбегімен ерекшеленеді”, – дейді жас палуан Павел Сериков. Айтуынша, Исламды мұнда бәрі үлгі тұтады.
ПАВЕЛ СЕРИКОВ, палуан:
— Исламмен бір залда жаттығу – мен үшін зор қуаныш. Оны бәрі үлгі етеді. Біз де соған қарап, өзімізді дамытуға тырысамыз.
Қазіргі уақытта Ислам Евлоев грек-рим күресінен өтетін Қазақстан чемпионатына қызу дайындық үстінде. Сонымен қатар, Азия чемпионатында топ жаруды көздеп отыр.
Жангельді Жамалиев