Шал ақын ауданының әкімі Қайрат Омаров өңірлік коммуникациялар алаңында есеп берді. Айтуынша, аудан бюджеті биыл 9,7 млрд теңгені құраған. Бұл былтырғы жылмен салыстырғанда 155%-ға көп. Аграрлық аймақтың басты көрсеткіштерінің бірі – орақ нәтижесі. Шалақындық еңбеккерлер 243 мың гектар жерден 300 мың тоннадан астам астық жинапты. Орташа шығымдылық 20 центнерді құрап отыр. Ауданда құрылыс саласында да ауыз толтырып айтарлық іс атқарылыпты. Биыл әлеуметтік аз қамтылған отбасыларды баспанамен қамтуға баса назар аударылған.
ҚАЙРАТ ОМАРОВ, Шал ақын ауданының әкімі:
— Ауданда тұрғын үй мен әлеуметтік нысандардың құрылысы, ғимараттарды күрделі және ағымдағы жөндеу, сондай-ақ көшелерде абаттандыру жұмыстары жүргізілуде. Негізгі мақсат – халыққа жайлы әрі қауіпсіз жағдай жасау. Құрылыс жұмыстарының көлемі 10 айда 12,5 млрд теңгені құрады, бұл өткен жылдың сәйкес кезеңімен салыстырғанда 2,7 есе көп. Пайдалануға 5 мың шаршы метр берілді. Биыл әлеуметтік осал топтарға арналған 20 тұрғын үй салынды. Оның 17-сі – Сергеевка қаласында, үшеуі – Бірлік ауылында.
Аудан халқының саны 17 мыңнан асады. Сырқаттанып қалған адам ауылдағы ФАП-қа немесе аудандық ауруханаға барады. Қайрат Омаровтың айтуынша шалақындықтардың денсаулығын қарайтын дәрігер жетіспейді. Ауданда бұл салада 170-ке жуық ақ халатты еңбек етеді. Қатарға әлі бірнеше маман керек.
ҚАЙРАТ ОМАРОВ, Шал ақын ауданының әкімі:
— Дәрігерлер тапшылығы 5 бірлікті құрайды. Анықтама үшін: онколог-маммолог – 1, стоматолог-ортопед – 1, терапевт – 1, акушер-гинеколог -1 , дерматовенеролог – 1. Кадр тапшылығын шешу үшін мамандарды тарту жұмыстары жүргізілуде. Олар үшін Шал ақын ауданы әкімдігінің коммуналдық меншігінен 11 жайлы пәтер мен тұрғын үй берілді. Дәрігерлерге біліктілігі мен мамандығына қарай 1,5 млн теңгеден 8,5 млн теңгеге дейін көтерме жәрдемақы төленуде.
Биыл аудан жолдарын жөндеуге 8 млрд теңгеден астам қаржы бөлінген. Бұл былтырғы жылмен салыстырғанда 6 есеге көп. Ауданда биыл бірнеше білім ұясы жөндеу көрді. Жалтыр, Ступинка, Бірлік негізгі мектептері мен аудан орталығындағы қос мектеп жаңаланды. Бұл мақсатқа барлығы – 276 млн теңге жұмсалған. Келесі жылы тағы 2 мектепте күрделі жөндеу жұмысын жүргізу жоспарланып отыр.
Ақтолқын Солтанханқызы