Бармағынан бал тамған аспаз. Жерлесіміз Егор Овсянников жақында Ресейдің Мәскеу қаласында өткен кулинариялық “Бас аспаздар шайқасы” сайысына қатысып, төрешілерді таңдай қақтырды. Солтүстікқазақстандық бұл сайыста арнайы қазақтың ұлттық тағамы – бешбармақты ұсынған. Егор оны дайындау барысында түрлі қиындықтарға да тап болған көрінеді. Себебі, шоу ережесі бойынша аспаз түсірілім күні өз тағамын 30 минут ішінде әзірлеп үлгеруі тиіс.
ЕГОР ОВСЯННИКОВ, бас аспаз:
— Кастинг барысында бас аспаз өзі дайындайтын 6-7 тағам түрін сайыстың арнайы коммисиясына ұсынуы тиіс. Қазақтың ұлттық тағамы – бешбармақты таңдадым. Олар қабылдады. Бірақ. бұл жердегі ендігі мәселе – оның әзірленуінде, өздеріңіз білетіндей, жылқы етінің дұрыс пісуіне де біраз уақыт керек. Сол себепті, жол бойы ет қайнатып, қамыр иледім. Түсірілім күні етті турап, қамырын дайындадым. Нәтижесі жаман емес. Бешбармақ Константин Ивлев пен Ренат Агзамовтың көңілінен шықты.
Биыл Егордың кулинария саласында қызмет етіп келе жатқанына 10 жыл болған. Айтуынша, ол аспаздыққа жастайынан қызығыпты.
ЕГОР ОВСЯННИКОВ, бас аспаз:
— Мен кішкентай кезімнен тамақ әзірлейтін едім. Анама қолғабыс болып ақырын кулинарияға қызыға бастадым. Кейін уақытша жұмыс ретінде мейрамханалардың біріне аспаз болып кірдім. Ары қарай дамып, 5 жылдан соң бас аспаз деңгейіне жеттім. Өзіме жұмысым ұнайды, одан ләззат аламын. Мотивацияны анам мен жұбайым береді, оларды үлгі тұтамын. Себебі, анам мен әйелім дайынтайтын тағамдардың дәмі тіл үйіреді.
Жерлесіміз, сонымен қатар, жақында Ресейдің белгілі академияларының бірінде шеберлігін шыңдап келген. Айтуынша, Мәскеудегі сайыстан кейін оны түрлі шетелдік жобаларға шақыра бастаған. Сол себепті, келер жылы жерлесіміз тағы бір шетелдік сайыста өнер көрсетуі бек мүмкін.
Ұлан Ыдырыс