“Қазақстан бірлік пен татулықтың мекені”. Бүгін осындай атаумен Жастар сарайында Республика күніне арналған кезекті шара өтті. Оны облыс бойынша Қылмыстық-атқару жүйесі департаментінің мамандары ұйымдастырды. Кейін жиналғандарды департамент бастығы Мұрат Нәкенов құттықтады.
МҰРАТ НӘКЕНОВ, СҚО бойынша қылмыстық-атқару жүйесі департаментінің бастығы:
— Еліміздің басты мерекелерінің бірі – Республика күнімен баршаңызды құттықтаймын! Бұл күн – мемлекетіміздің Тәуелсіздігі мен бірлігінің символы.
Кезек марапаттау рәсіміне де келді. Алдымен қошеметке сала ардагерлері бөленді. Сонымен қатар, қылмыстық-атқару жүйесі қызметкерлерін тәрбиелеген ата-аналары Алғыс хатпен марапатталды. СҚО бойынша ҚАЖД бастығының грамотасымен марапатталғандардың бірі – Азиза Мұқанова. Ағаларының жолын қуған нәзікжандының бұл салада еңбек етіп жүргеніне биыл 6 жыл толып отыр.
АЗИЗА МҰҚАНОВА, СҚО бойынша ҚАЖД №50 мекемесінің инспекторы:
— Жергілікті университетімізде «Құқықтану» мамандығына оқыдым. Кейін бірден жұмысқа орналастым. Бақылаушы болып жұмыс істедім. Қазіргі уақытта №50 мекемесінде және әйелдер колониясында сотталғандарды босату және жұмысқа орналастыру жөніндегі инспектормын.
Жалпы, Республика күніне орай ұйымдастырылған шарада 50-ге жуық адам қошеметке бөленді. Шара мерекелік концертпен жалғасын тапты.
Ақтолқын Солтанханқызы