Петропавлда үстел теннисінен облыстық іріктеу турнирі өтті. Жарысқа 11 мен 17 жас аралығындағы ұл-қыздар қатысты. Сынға түскен балалардың арасында болашақта кәсіби спортшы атануды мақсат еткендер бар.
ҚАНАТ БӘСЕНОВ, жарысқа қатысушы:
— Назарбаев Зияткерлік мектебінде 9-шы сыныпта оқимын. Үстел теннисімен айналысып жүргеніме 8 жыл болып қалды. Осы үстел теннисі орталығында жаттығамын.
Спортшылар бір күн ғана сайысады. Үздіктердің аты-жөні бойынша тізім құрылады. Оза шапқандар қыркүйек айының орта тұсында Қарағанды қаласында өтетін ел чемпионатында бақ сынайды. Кеншілер шаһарында облыстың намысын 16 ұл-қыз қорғайды.
Үстел теннисінен Солтүстік Қазақстан облысының аға жаттықтырушысы қызметін Әділет Қауымбаев атқарады. Ол жақында ғана шырайлы Шымкенттен келіп, білек сыбына іске кірісіпті. Маманның сөзінше, теріскейлік жастардың қызығушылығы жоғары. Ерінбей еңбек етудің арқасында чемпиондар дайындауға болады.
ӘДІЛЕТ ҚАУЫМБАЕВ, үстел теннисінен СҚО аға жаттықтырушысы:
— Жарысқа адам дайындау – үлкен еңбек. Балалар сайысқа қатысып қана қоймай, басқа балалардың ойынын қарап, тәжірибе жинауы қажет.
Жалпы, тартысты жарысқа 40-қа жуық спортшы қатысты. Турнир соңында үздіктер тұғырға көтеріліп, марапатқа ие болды.
Мәдина Қаби