Биыл облыс автожолдарын жөндеуге қатысты 12 жоба жүзеге асырылып жатыр. Оның үшеуі – облыстық маңызы бар жолдар. Барлық жұмыстарға 4,2 млрд теңге бөлінген. Жобалар аясында 80 шақырым жол төсемі жаңартылады. Аудандағы жалпы жол ұзындығы – 446 шақырым. Биыл 37,7 шақырымы жөнделмек.
РУСЛАН АҢБАЕВ, Ғ. Мүсірепов ауданының әкімі:
— Ауданда 6 жоба жүзеге асырылып жатыр. Өткен жылы бастағандарымыз, биыл қолға алғандарымыз бар. 3 жоба Новоишимское, Көкалажар және Рузаевка ауылдарында жүріп жатыр. 1 млрд 300 млн теңгенің жұмысы, 80% игерілді.
Ауданның негізгі жобаларының бірі – Чистополье ауылынан Шөптікөл елді мекеніне дейінгі автожолды жөндеу. Оның ұзындығы – 27 шақырым, 3,5 млрд теңге жұмсалмақ.
ЕРДЕН ШОРТЫБАЕВ, СҚО жолаушылар көлігі және автомобиль жолдары басқармасының басшысы:
— Бүгінгі күні жолдың 23 шақырымында рециклдеу әдісін қолдану жұмыстары аяқталды. 17 шақырым жолдың үстіне асфальт төселді. Биылғы жылға бөлінген барлық қаржы игерілді. Жұмыстар кестеге сай жүріп жатыр, жылдың соңына дейін жобаны толық аяқтау жоспарланған.
Келесі нысан – «Ишим Гарант» ЖШС қызметкерлеріне арналып салынған Новоишимское ауылындағы тұрғын үйлер болды. Мұнда жалпы 11 үй тұрғызылды, әрқайсысының құны – 14 млн теңге. Барлық жұмыс компания есебінен жүргізілді. Мерғалимовтар отбасы бұл жерде төрт жылдан бері тұрады. Ерлі-зайыптылардың екеуі де кәсіпорында еңбек етеді: Қанат – жүргізуші, Гүлнара – бас бухгалтер. Олардың айтуынша, баспаналары жұмыс орнына жақын, жайлы. Олар ауылда тұрақтап қалмақ. Тұрғын үйлерден бөлек аумақта футбол алаңы мен балалар ойын алаңы салынған.
«Новоишимский мелькомбинат» – Новоишимское ауылындағы құрамажем зауыты. Зауыттың жылдық қуаттылығы – 750 мың тонна. Оның құрамында 9 мың тоннаға арналған элеватор, заманауи тазарту және қаптау цехтары, автоматтандырылған қойма бар. Бұл – құны 4 млрд теңгеден асатын стратегиялық жоба. Нысанда ұн өндірісі басталды, өнімді Қытайға экспорттау жоспарланған.
Өңір басшысы білім беру нысандарында да болды. Әсіресе, 120 орынға арналған «Дюймовочка» балабақшасына ерекше назар аударылды. Биыл мұнда 275,5 млн теңгеге күрделі жөндеу жүргізілді. Нәтижесінде балалар мен қызметкерлер үшін жайлы жағдай жасалған. Келесі нысан – «Жаңа Есіл» теміржол станциясы. Вокзал алдындағы алаңды қайта жаңғыртуға 193 млн теңге бөлінген.
Өңірдің болашағы зор инвестициялық жобаларының бірі – «БуденноеСК» ЖШС жүзеге асырып жатқан заманауи тауар-сүт фермасының құрылысы. Жобаны жүзеге асыру 2023 жылы басталған, жалпы құны – 9 млрд теңге. Жаңа ферма 1200 ірі қара малға арналған, жылына 10 мың тонна сүт өндіруге қауқарлы. Бүгінде құрылыс жұмыстары аяқталуға жақын.
Жыл соңына дейін 800 бас ірі қара мал әкеліп, кешенді толық іске қосу жоспарланған. Жоба аясында шаруашылық әлеуметтік мәселелерге де көңіл бөліп жатыр – кәсіпорын жұмысшыларына әрқайсысы 23 млн теңге тұратын 6 үй тұрғызды. Айта кету керек, өңірде егін орағы қызған. Ғабит Мүсірепов атындағы ауданның егіс көлемі – 678 мың гектар. Жұмыс сапары барысында ауыл шаруашылығы тауар өндірушілері облыс әкіміне жұмыс қарқыны, техника дайындығы және алдын ала өнім болжамы туралы баяндады. «Мемлекеттік қолдау шараларының арқасында биыл өнім мол болуы тиіс. Егінді уақытылы жинауды қамтамасыз ету керек», – деп тапсырды өңір басшысы.
Сапар соңында ауданда жергілікті кәсіпкерлермен кездесу өтті.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
— Жалпыұлттық пұл аясында 890 млрд теңгенің 50 инвестжобасы жүзеге асырылып жатыр. 7,5 мың жаңа жұмыс орны ашылады. 4 жоба осы Ғабит Мүсірепов ауданының аумағында болады. Жалпы сомасы – 10 млрд теңге».
Сапар қорытындысы бойынша өңір басшысы жол құрылысын жеделдетуді және сапасын қатаң бақылауды тапсырды. Сондай-ақ инвестиция тарту мен жаңа жұмыс орындарын ашуға ерекше назар аударылмақ.