Ғ. Мүсірепов ауданының әкімі Руслан Аңбаев тұрғындарға арнап сөз сөйледі. Ол өңірді дамыту жоспарлары мен ауыл шаруашылығы, білім беру, денсаулық сақтау салаларындағы қол жеткізілген жетістіктер туралы айтып өтті. Сондай-ақ, әлеуметтік салаға да тоқталды.
РУСЛАН АҢБАЕВ, Ғ. Мүсірепов ауданының әкімі:
— Биылғы жылы ауданның жергілікті бюджеті 3,5 млрд теңгені құрады. Оның 1,7 миллиарды – облыстық, қалғаны – аудандық бюджет есебінен. Орташа жалақы 290 мың теңге деңгейінде. Бұл өткен жылмен салыстырғанда 13,2 пайызға артық.
Чистополье ауылының тұрғыны облыс және аудан басшылығына ауыл тұрғындарының атынан сұрақ қойды. Ол елді мекен халқын толғандырып отырған бірнеше маңызды мәселені көтерді. Әсіресе, жолдардың сапасы ең өзекті проблемалардың бірі екенін айтты. Оның айтуынша, асфальт төсеу мәселесі әлі күнге дейін шешімін таппай келеді.
Денсаулық сақтау саласындағы мәселе де өзекті күйінде қалып отыр. Облыс бойынша медициналық кадрлардың жетіспеушілігі байқалса, Чистополье ауылының тұрғындарын жергілікті ауруханадағы күндізгі стационардың жабылуы алаңдатады. Бұл шешім тұрғындардың медициналық көмекке қолжетімділігін едәуір шектеп, халықтың үлкен алаңдаушылығын туғызды.
Облыс әкімі тұрғындарға күндізгі стационардың жабылмайтынын жеткізді. Медициналық мекеме бұрынғы режимде жұмысын жалғастыра береді. Тағы бір маңызды мәселе – ғаламтордың сапасы. Өкінішке қарай, ауданның барлық тұрғындары заманауи цифрлық технологияларға тең қол жеткізе алмай отыр.
Кездесу соңында облыс әкімі өңірде атқарылып жатқан жұмыстар мен болашаққа жоспарланған жобалар туралы айтып, ауданның дамуына және халықтың өмір сүру сапасын арттыруға бағытталған бастамаларды қорытындылады. Әсіресе, ауыл шаруашылығы өнімін өндірушілердің елді мекендерді абаттандыруға белсенді қатысуына баса назар аударылды.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
– Өңір өміріне белсенді атсалысып жүрген барлық ауыл шаруашылығы тауар өндірушілерін атап шығу мүмкін емес. Мысалы, «Дайындық» ЖШС-нің директоры былтыр спорт кешенін салып берсе, биыл құны 290 млн теңге болатын ауылдық клубты пайдалануға берді.
Қабылдау барысында аудан тұрғындарын толғандырған инфрақұрылым, денсаулық сақтау және әлеуметтік салаға қатысты өзекті мәселелер қаралды. Облыс әкімі мен салалық департамент, басқарма басшылары маңызды сұрақтарға түсініктеме беріп, оларды шешу бағытында тиісті шаралар қабылданатынын жеткізді.