Мамлют ауданында “Таза Қазақстан” республикалық акциясы жалғасып жатыр. Жақында Мамлютка қаласының орталығындағы “Достық” саябағы жаңа кейіпке енді. Абаттандыру жұмыстарына жастар ресурстық орталығының, бюджеттік және өзге де ұйымдардың өкілдері мен қоғамдық іске құштар тұрғындар белсенді қатысты. Олар өскен жасыл желектерді қырқып, шағын архитектуралық мүсіндерді бояп, жолды сыпырды. Сонымен қатар, мұндай игі бастама Покровка ауылында да қолға алынды. Нәтижесінде елді мекен іші, аулалар тазарды. Жалпы, ағымдағы жылы Мамлют ауданында 40 сенбілік ұйымдастырылған. Оған 1300-ден астам адам мен 40 ұйым қатысты. “Таза Қазақстан” акциясы аясындағы іс-шаралар барысында 200 текше метрден астам қоқыс шығарылды. 849 көшет, 450 бұта отырғызылды, сондай-ақ 13 саябақ пен саяжол және 32 әлеуметтік нысан маңы тазартылды.