«Бақытты отбасы – бақытты ел». Мамлют ауданында осындай атаумен акция ұйымдастырылды. Шара аясында жергілікті полиция бөлімінің тәртіп сақшылары мен «Әйелдерді қорғау орталығы» ұйымының өкілдері профилактикалық кездесулер өткізуде. Бастамашыл топ отбасылық және тұрмыстық зорлық-зомбылыққа тұсау салғысы келеді.
ӘСЕМГҮЛ ДӘУЕНОВА, Мамлют ауданы ПБ жергілікті полиция қызметі бөлімшесінің бастығы:
— ІІМ-де отбасындағы зорлық-зомбылықты бағалаудың арнайы стандарттары әзірленген. Бұл ауыр қылмыстардың алдын-алу үшін бағытталған іс. Қазір агрессорларды жазалаудың орнына оларды психологтармен кездестіріп, көмек берілуде.
Заң талаптары да айтылады. Аудандық полиция бөлімінің акт залында өткен кездесуде тәртіп сақшылары мен мамандар отбасының шырқын бұзатын жандарға заңнамаға енгізілген соңғы өзгерістерді баяндады. Қазір ұрып-соғу мен жеңіл дене жарақатын келтіру қылмыс ретінде қарастырылады. Яғни, жаза қатаңдады.
ӘСЕМГҮЛ ДӘУЕНОВА, Мамлют ауданы ПБ жергілікті полиция қызметі бөлімшесінің бастығы:
— Ағымдағы жылдың 25-ші тамызынан 10-шы қыркүйекке дейін біздің облыста “Бақытты отбасы” акциясы өтеді. Шараның мақсаты әйелдерге қатысты тұрмыстық зорлық-зомбылықтың алдын алу, аналар мен балаларды қорғау болып табылады.
Кездесуден кейін полицейлер Мамлют ауданының орталығында есепте тұрған отбасыларға барып, үйдегі жағдайды білді.
Актолкын Солтанханкызы