Солтүстік Қазақстан облысының диқандары қарқын алды. Ауыл шаруашылығы және жер қатынастары басқармасының басшысы Дәурен Токужиновтың хабарлауынша, 500 мың гектарға жуық алқаптағы дәнді және бұршақты дақылдар жиналған.
ДӘУРЕН ТОКУЖИНОВ, СҚО ауыл шаруашылығы және жер қатынастары басқармасының басшысы:
— Қазіргі таңда облыста дәнді және бұршақты дақылдарды жинау жұмыстары жүргізілуде. Бүгінгі күні 486,0 мың гектардағы немесе жалпы аумақтың 16,1 пайызындағы астық жиналды. Өнімділік көрсеткіші – 14,5 центнер. 706,9 мың тонна өнім қамбаға жеткізілді. Бұршақ пен жасымықты соғу жұмыстары 65 пайызға орындалды. 342,4 мың тонна бұршақты дақылдар бастырылды.
Брифинг барысында спикер көңіл қуантарлық астық жинап жатқан агроқұрылымдарды да атады. Олар: «Шатило и К», Прометей-Агро», «Кантемир Агро», «Рустикус» және «СК Агро». Теріскейдің құнарлы алқаптарынан жиналған бұршақты дақылдар экспортталып та жатыр. Бүгінде 85 мың тоннадан астам өнім шекара сыртына сатылған.
ДӘУРЕН ТОКУЖИНОВ, СҚО ауыл шаруашылығы және жер қатынастары басқармасының басшысы:
— Өнімді сыртқы нарыққа шығару қиындық туғызбайды: фитосанитариялық паспорт пен экспорттық сертификат 2 жұмыс күнінде ғана беріледі. Мағжан Жұмабаев ауданында «СК Агро» серіктестігі жасымықты тікелей Түркияға жөнелтеді. Жүк көліктері келіп, тауарды бірден алып кетеді. Жасымықты өсіруге бидаймен бірдей шығын жұмсалады. Алайда оның нарықтық құны 2,5 есе жоғары.
Күзгі дала жұмыстарына 58,2 мың тонна жеңілдетілген дизель отыны бөлінген. Литрі 254 теңге тұрады. Ал нарықтағы баға – 315 теңге.