30 жыл бойы еркіндіктің негізіне айналған Конституция халыққа таңдау құқығын берді. Алдағы даму жолымыздың бағыт-бағдарын айқындады. Адам өмірі мен бостандығының кепіліне айналды. Осыны жақсы түсінетін солтүстікқазақстандықтар Ата заң күніне орай Петропавлда өткен айтулы шараға бір кісідей жиналды. Салтанатты жиын басында Конституциямыз ортаға алынды, рухты көтерер Әнұран шырқалды.
Жиналған қауымды ел тарихындағы маңызды күнмен облыс әкімі Ғауез Нұрмұхамбетов құттықтады. Аймақ басшысы өз сөзінде Ата заңымыздың маңыздылығына тоқталды.
ҒАУЕЗ НҰРМҰХАМБЕТОВ, Солтүстік Қазақстан облысының әкімі:
— Ата заң тек құқықтық құжат емес. Халқымыздың асқақ арманы мен ортақ мүддесінің көрінісі. Конституция әрбір азаматтың құқығын қорғап, әділетті өмір сүруге мүмкіндік береді.
Өлкенің дамуына сүбелі үлесін қосып, қоғамдық өмірмен біте қайнасып жүрген жерлестеріміз түрлі марапатқа ие болды. Ең алдымен бірқатар азамат Мемлекет басшысының жарлығы бойынша қоғамдық қызметтегі сіңірген еңбегі үшін “Конституция – 30 жыл” медалімен марапатталды. 2 ана көпшілік алдында “Алтын алқаға” ие болды. Соның бірі – Әйгерім Шайхеслямова. Азаматша – 7 баланың анасы. Қуанышында шек жоқ. Облыс әкімінің қолынан марапат алу нәзікжандының үш ұйықтаса да түсіне кірмепті.
ӘЙГЕРІМ ШАЙХЕСЛЯМОВА, “Алтын алқа” иегері, Жамбыл ауданы:
— Бала тәрбиесіне ерекше көңіл бөлемін. Елімізде көпбалалы аналардың саны көп болсын! Ұл-қыздарымыз аман болсын!
Еліміздің болашағы – жастар. Облысымыз өскелең ұрпаққа үміт артады, зор қолдау білдіреді. Мерекелік шарада 3 жалынды жас облыс әкімінің грантына ие болды. Арман Имақовтың төбесі көкке бір елі жетпей жүр. Ол жалпы конкурс бойынша қалаған жоғары оқу орнына түсе алмапты. Талапты әрі талантты жерлесіміздің арманы орындалды. Үміт отын өшірмеген талапкер әкімдікке жазған өтініші негізінде Күләш Байсейітова атындағы Қазақ ұлттық өнер университетінде тегін оқитын болды. Бұл – Қазақстандағы ең іргелі шығармашылық орда.
АРМАН ИМАҚОВ, Күләш Байсейітова атындағы Қазақ ұлттық өнер университетінің студенті:
— Облыс әкіміне алғысым шексіз. Маған артылған үмітті ақтаймын. Еліміздің дамуына үлесімді қосамын. Оқуды аяқтаған соң облысымызға келіп, еңбек етемін.
Жиында бірқатар азамат мемлекеттік қызметке де қабылданып, адал еңбек етуге ант берді. Өңірде жастарға жол сілтеп, жақсылыққа баулитын ел ағалары жетерлік. Әрдайым көп болсын. Ата заңның өткені мен бүгінін жіті білетін тыл ардагері Тілек Әбдірахманов өскелең ұрпақты үнемі тәртіпке шақырады. Түрлі іс-шараларға қатысып, ақылын айтады.
ТІЛЕК ӘБДІРАХМАНОВ, тыл ардагері, СҚО Құрметті азаматы:
— Әр адам заңға бағыну керек. Өз басым Мемлекет басшысының “Заң және Тәртіп” қағидатын қолдаймын.
Қабылданғанына 30 жыл болатын Ата заңның негізінде облысымыз да қарқынды дамып келеді. Тәуелсіздік жылдары ішінде өңірде 42 заманауи тауарлы-сүт фермасы салынды. Қазіргі таңда 900 млрд теңгенің 52 инвестициялық жобасы жүзеге асуда. Соңғы 5 жылда ауданы 1,5 млн шаршы метрді құрайтын көпқабатты үйлер қолданысқа берілді. 80 мың жерлесіміз баспаналы болды. 3 мың шақырым жол жөнделіп, 49 медициналық мекеме салынды. 7 жаңа мектеп тұрғызылып, 215 білім мекемесі күрделі жөндеуден өтті.
Нұрасыл Ахмет