Конституция күні қарсаңында С. Мұқанов атындағы облыстық кітапханада “Ата заң – кемел келешектің кепілі” атты дөңгелек үстел өтті. Шараға әртүрлі сала өкілдері қатысып, өз баяндамаларын оқыды. Мінберге шыққан жерлестеріміз басты құжаттың маңыздылығын, оның елдің бірлігі мен татулығын сақтаудағы рөлін атап өтті. Жиын қатысушылары үшін кіреберісте “Конституция – мәңгілік елдің тұғыры” атты кітап көрмесі де қанат жайды. Мұндағы әр еңбек Ата заңға байланысты болды.
БОЛАТ ҚОЖАХМЕТОВ, “Қазақстан халық партиясы” СҚОФ төрағасының орынбасары:
— Конституциямыз – халықтың құқығы мен мүддесін қорғаудағы негізгі құжат. Біздің Ата заңымыз халықтық болып табылады. Оны қабылдау кезеңінде барлық азаматтар дауыс беріп, таңдау жасады. Яғни, тұрғындардың пікірі ескерілді. Біз дұрыс жолда келе жатырмыз. Бұл ретте заңдар жинағының үлесі зор. Мереке құтты болсын!
Ақтолқын Солтанханқызы