Ата заңның 30 жылдығына орай Петропавлдағы Ұлттық ұланның 6637 әскери бөлімінің қызметкерлері мен жауынгерлері де марапатталды.
Ортада – әскери бөлімнің командирі Досан Күркенов. Ол барша әріптестерін келе жатқан мерекемен құттықтады.
ДОСАН КҮРКЕНОВ, ҚР ҰҰ 6637 әскери бөлімінің командирі:
— Конституция – егемен еліміздің демократиялық құндылықтарын айқындайтын басты құжат. Ата заңымыз азаматтардың жақсы өмір сүруіне жағдай туғызып отыр.
Әскери бөлімде мыңға жуық адам қызмет атқаруда. Бүгін оның бірқатары жауынгерлік әзірлікті сақтаудағы көрсеткіштері мен үлгілі тәртібі үшін марапатталды. Солардың бірі – Ұлан Өсімбаев. Азаматтың ел тыныштығын күзетіп жүргеніне 15 жыл болған. Есімін әкесі әскери адам болсын деген ниетпен ырымдап қойыпты. Ол зейнетке дейін осы салада еңбек еткісі келеді.
ҰЛАН ӨСІМБАЕВ, ҚР ҰҰ 6637 әскери бөлімінің взвод командирі:
— 6 ұлым мен 1 қызым бар. Ұлдарым менің жолымды қуғанын қалаймын.
Ұлттық ұланның 6637 әскери бөлімінің қоғам үшін маңызы зор. Қызметкерлері мен жауынгерлері күні-түні қаланың тыныштығын күзетеді, түзету мекемесіндегі тәртіпті қадағалайды. Былтыр орын алған табиғи апат кезінде де аянып қалмады. Биыл да тәуліктеп бөгеттерді нығайтты, елді мекендерге қарғын судың өтіп кетуіне жол бермеді. Темір үзетін жігіттердің әрқайсысы марапатқа лайық.
Салтанатты жиында 20-дан астам адам құрметке бөленді. Олар ҚР ҰҰ бас қолбасшылығы мен бөлім командирінің атынан грамоталарға ие болды.
Нұрасыл Ахмет