Петропавлда талапты нәзікжандыларға арналған «Табыс Qyz» атты тегін оқыту аяқталды. Облыстық кәсіпкерлер палатасы мен Әйелдер кәсіпкерлігі мәселелері жөніндегі салааралық кеңес ұйымдастырған 1 айлық курс 8 сабақтан тұрды. Маркетинг, менеджмент, қаржы, бухгалтерия, жеке бренд және басқа да тақырыптар негізінде білім алған азаматшаларға арнайы сертификат табысталды. Бұлар – арнайы іріктеуден өткен арулар.
ӘСЕЛ САМАРАТОВА, СҚО кәсіпкерлер палатасы шағын бизнесті дамыту бөлімінің басшысы:
— Біздің курсқа қатысу үшін 100-ге жуық адам өтініш білдірді. Арасынан 10 қатысушы іріктеліп алынды. Өзіміздің талаптарымыз бар. Үміт білдірген азаматша Петропавл қаласында тұруы тиіс. Өзінің кәсібі болғаны жөн. Біз мұндай жандарды жан-жақты оқытамыз. Әйелдер кәсіпкерлігі мәселелері жөніндегі салааралық кеңес өкілдері білім береді.
Білім алып, таным көкжиегін кеңейтемін дейтін азаматшалардың құлағына алтын сырға! Петропавлда алдағы уақытта да осындай оқыту курсы ұйымдастырылмақ.
Байболат Құлтанов