«QYZYLJAR art» орталығында Ата заң күніне арналған интерактивті ойын ұйымдастырылды. “Конституция татулық пен келісім кепілі” тақырыбы берілген брейн-рингке қаламыздағы белсенді жастар қатысты. Олардың заңды қаншалықты білетіндері тексерілді.
ДАНИИЛ ХРИКУН, қатысушы:
— 14 жастамын. Өзім қаламызда өткізілетін түрлі іс-шараға белсенді қатысамын. Бүгінгі ойында өзіміздің топқа жеңіс, ал қарсыластарыма сәттілік тілеймін.
3 кезеңнен тұратын сайысқа 3 топ қатысты. Алғашқысында жастар қағаздарды ретімен қойып, Ата заңның баптарын тізу қажет. Екінші турда ұл-қыздарға логикалық сұрақтар қойылады. Ал шешуші кезеңде олар ребусты шешеді. Қазылар – облыстық прокуратураның қызметкерлері. Білікті мамандар ұл-қыздардың білімдерін тексеруге ынталы.
АРЫСТАН ШЫНТЕМІР, СҚО прокуратурасының басқарма прокуроры:
— Бізге заң үстемдігін қамтамасыз ету ғана емес, білімімізді жас ұрпақпен бөлісу де аса маңызды. Конституция бірлік пен келісімнің негізі болып табылады. Ал мұндай интерактивті ойындар оның құндылығын түсінуге жақсы мүмкіндік береді.
Интерактивті ойын ұзаққа созылмады. Шара соңында қатысушы жастарға диплом және тәтті сыйлықтар табыс етілді.
Ақтолқын Солтанханқызы