Жаңа оқу жылынан бастап еліміздегі барлық білім беру ұйымдарында, соның ішінде жекеменшік мектептерде де «Адал азамат» атты біртұтас тәрбие бағдарламасы енгізіледі. Бұл – бұрын жүзеге асырылған «Біртұтас тәрбие» тұжырымдамасының жалғасы, бірақ мазмұны жаңартылып, Мемлекет басшысының «Адал азамат – адал еңбек – адал табыс» идеологиялық қағидасымен үндестірілген. Бұл туралы Оқу-ағарту министрлігінің сайтында жазылды. Білікті педагог, ЛОРД мектеп-лицейінің директоры Светлана Шәукерова бағдарлама ел болашағы – білімді, саналы ұрпақты тәрбиелеуде маңызы зор дейді.
СВЕТЛАНА ШӘУКЕРОВА, ЛОРД дарынды балалар үшін мамандандырылған облыстық мектеп-лицей-интернатының директоры:
— Жалпы, бұл бағдарламаның мақсаты – елжанды, еңбекқор, білімді азамат тәрбиелеу. Сонымен қатар, қоғамда бәсекеге қабілетті тұлғаларды қалыптастыру болып табылады. Жалпы, бағдарлама ұлттық құндылықтарға негізделген 6 жоба бойынша негізделіп жатыр.
Негізі, бұл бағдарлама мектептерде 2023 жылы пилоттық режимде қолға алынған екен. Осы ретте ЛОРД мектеп-лицейінде атқарылған жұмыс ауқымды. Білім ұясында білім мен тәрбие қатар жүреді. Мұнда сабақтан тыс жұмыстарға да баса мән беріледі.
СВЕТЛАНА ШӘУКЕРОВА, ЛОРД дарынды балалар үшін мамандандырылған облыстық мектеп-лицей-интернатының директоры:
— Сонымен қоса, балаларды отансүйгіштікке тәрбиелеу мақсатында “Отыз қазақ” жобасы бар. Жоба аясында балалар қазақ тілінде ән жаттап, тілдерін жаттықтырады. Сондай-ақ, “Адал азамат” бағдарлама аясында “Смарт бала” жобасы бар. Мұнда мақсат – ұл-қыздардың ғылыми жұмыстар жасай келе зерттеу жұмыстарына бейімдеу болып табылады.
Сонымен қатар, «Өнегелі 15 минут», күй әуенімен қоңырау соғу, ұлттық ойындар секілді жаңа форматтар енгізілген. Қазіргі күні “ЛОРД” мектеп-лицейінің ұжымы мазмұны жаңартылған бағдарлама аясында жұмыс істеуге сақадай сай отыр.
Ақтолқын Солтанханқызы