Теріскейлік тәртіп сақшылары жыл басынан бері есірткіге қатысты 139 құқық бұзушылық анықтады. Бұл өткен жылдың сәйкес кезеңімен салыстырғанда едәуір көп. Оның басым бөлігі нашаны сатуға қатысты. Заңсыз айналымнан барлығы – 40 келіден астам есірткі тәркіленген. Табылған нашаның 30 келіден астамын марихуана құрайды. Қалғаны – синтетикалық есірткі, қарасора мен гашиш.
Үй жағдайында ұйымдастырылған 9 фитонаркозертхана жойылды. Мамандардың айтуынша, облысқа синтетикалық есірткі басқа өңірлерден, негізінен Астана, Алматы қалалары мен Ақмола және Павлодар облыстарынан «тасымалдаушылар» арқылы жеткізіледі. Нәтижесінде синтетикалық есірткі жеткізудің 4 арнасы жабылған.
АСҚАР МҰХАМЕТҚАЛИЕВ, СҚО ПД бастығының бірінші орынбасары:
— Мысалы, 2025 жылдың 7 сәуірінде «Оңтүстік» бекетінде 26 жастағы ер адам басқарған «Daewoo Nexia» көлігі тоқтатылды. Тінту барысында шамамен 500 грамм синтетикалық есірткі және 100 грамм каннабис шайыры тәркіленді. Күдікті ер адам республикалық интернет-дүкен үшін синтетикалық есірткі тасымалдаушысы ретінде әрекет еткен. Қылмыстық іс қозғалды, күдікті қамауға алынды.