Петропавл жастары нашақорлыққа қарсы! Облыс орталығында Халықаралық есірткіге қарсы күрес күніне орай бұқаралық велошеру өтті. Жұртшылықты жұдырықша жұмылуға шақыратын шараға 100-ден астам адам қатысты. Олар: оқушылар мен спортшылар.
ОЛЖАС АХМЕТЖАН, БЖСМ жұмыс жөніндегі облыстық дене шынықтыру және спорт орталығының басшысы:
– Нашақорлыққа қарсы іс-шаралар ұйымдастырылып жатыр. Велошеру өтеді. Осы жарысқа 120-дан адам қатысады. Бүгінгі іс-шараны полиция департаменті мен спорт басқармасы бірлесе өткізуде.
Велошеру алдында Сәбит Мұқанов атындағы облыстық кітапхана алдында есірткіге қарсы жұмыстар жөнінде және салауатты өмір салтын ұстануға қатысты аз-кем ақпар айтылды. Кейін қатысушылар темір тұлпарларына “қамшы басты”. Олар орталық көшелермен 3 шақырым жүріп өтті.
АНАСТАСИЯ СЕМЕНОВА, Н.К.Крупская атындағы №10 орта мектебінің оқушысы:
– Есірткіге қатысты бүгінгі іс-шараның маңызы зор. Бұл мәселе жастар арасында өзекті саналады. Өзім зиянды заттардың қаупін білемін. Сол үшін велошеруді қолдай келдім.
Велошеру – есірткіге қарсы айлық шеңберінде ұйымдастырылған алғашқы шара. Алдағы уақытта тағы бірнеше бастама қолға алынады. Олардың қатарында жүгіру және жекпе-жектен сайыстар бар.