Бұл туралы ҚР Денсаулық сақтау министрлігі санэпидқадағалау Комитетінің вакцинамен басқарылатын инфекцияларды бақылау басқармасының басшысы Нұршай Әзімбаева мәлімдеді. Оның мәліметтері бойынша, қызылша ауруының 75% – дан астамы және көкжөтелдің 87% – ы вакцинацияланбаған балаларда кездеседі.
Тек 2024 жылдың бірінші тоқсанында 7 мыңға жуық ата-ана балаларын вакцинациялаудан бас тартты. Әзімбаева бұл эпидемиологиялық жағдайға тікелей әсер ететінін атап өтті. Ол сондай – ақ иммундаудың арқасында Қазақстанда 1996 жылдан бастап полиомиелит, ал 2009 жылдан бастап дифтерия жағдайлары тіркелмегенін еске салды. 34 жыл ішінде паротит ауруы 100 есе, А гепатиті 32 есе, В гепатиті 92 есе, ал қызамық 2 мың еседен астам төмендеді. Елімізде жыл сайын 4 млн-нан астам адам егіледі, ал вакциналарды сатып алуға 38 млрд теңге бөлінеді.
Биыл Еуропалық иммундау апталығы 27 сәуір мен 3 мамыр аралығында өтеді.